ԵՐԵՎԱՆ, 4 մարտի – Sputnik. ԱՄՆ-ի և Իսրայելի հետ մարտական գործողությունների մեկնարկից ի վեր Իրանում ավելի քան 6 հազար մարդ է տուժել։ Այս մասին հայտարարել է Իսլամական Հանրապետության առողջապահության նախարարության մամուլի ծառայության ղեկավար Հոսեյն Քերմանպուրը։
«Մեր ժողովրդի դեմ ԱՄՆ–ի և իսրայելական ռեժիմի համատեղ գործողության հետևանքները։ Վիրավորների ընդհանուր թիվը 6186 է... Սպանվածներինը` 926», – գրել է նա X սոցցանցում։
Նրա խոսքով՝ զոհվածներից առնվազն 183-ը 18 տարեկան չկային, տուժած անչափահասների թիվը 340 է։
Ավելի վաղ Իրանի նահատակների և վետերանների գործերով հիմնադրամը հայտնել էր, որ զոհերի թիվը հասել է1045-ի, նրանք քաղաքացիական անձինք և զինվորականներ են։
Հիշեցնենք` չնայած Ժնևում Օմանի միջնորդությամբ Վաշինգտոնի և Թեհրանի միջև իրանական «միջուկային դոսյեի» շուրջ բանակցություններին, ԱՄՆ–ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին ու նրա կինը, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Հորմոզգան նահանգի Մինաբ քաղաքում աղջիկների համար նախատեսված «Շաջարե Թայեբե» տարրական դպրոցի ռմբակոծությունից զոհվել է 170 երեխա ու աշխատակից։ Երկրում 40-օրյա սուգ է հայտարարվել:
Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: