Երևանում՝ Հայաստանի նկարիչների միության դահլիճում, Հովհաննես Այվազովսկու կտավներին նվիրված ցուցահանդես է գործում:
«Anima Exhibition»-ի մուլտիմեդիոն նախագիծը նոր շունչ է հաղորդել աշխարհահռչակ ծովանկարչի աշխատանքներին. նախագիծն առաջարկում է 43 րոպեանոց «նավարկություն» մեծ նկարչի կյանքի կարևորագույն իրադարձությունների ու շուրջ 300 կտավների անիմացիոն մեկնաբանությունների միջով:
Ինչպես նշում է նախագծի համակարգող Ռոզա Ներսեսյանը, ցուցադրությունը կազմակերպելու համար մասնագետների մեծ թիմ է աշխատել՝ անիմատորներ, նկարազարդողներ, տեխնիկական մասնագետներ: Նրա խոսքով՝ արդեն ցուցահանդես են այցելել ինչպես կրտսեր, այնպես էլ ավագ դասարանների ավելի քան 3000 աշակերտներ:
Նախագծի նկատմամբ հետաքրքրություն են դրսևորում ոչ միայն տեղացիները, այլև զբոսաշրջիկները։ Թեև հիմնական հնչյունավորումն արված է հայերենով, բայց դա չի խանգարում, որ հանդիսատեսը լիովին խորասուզվի Այվազովսկու ստեղծագործության մթնոլորտում:
Ցուցադրությունը բաց է մինչև ապրիլի 2-ը։