ԵՐԵՎԱՆ, 24 փետրվարի - Sputnik. Եվրասիական տնտեսական հանձնաժողովի (ԵՏՀ) խորհուրդը հավանություն է տվել համացանցում անօրինական բովանդակության դեմ պայքարի մասին համաձայնագրի ստորագրման ընթացակարգերի մեկնարկին: Այս մասին հայտնում է կառույցի մամուլի ծառայությունը։
«Եվրասիական տնտեսական հանձնաժողովի խորհուրդը համացանցում մտավոր սեփականության օբյեկտների նկատմամբ իրավունքների խախտումների դեմ պայքարի համաձայնեցված մոտեցումների մասին համաձայնագրի նախագիծն ուղարկել է Եվրասիական տնտեսական միության երկրներ՝ ստորագրման համար անհրաժեշտ ներպետական ընթացակարգեր անցնելու համար։ Փաստաթուղթը սահմանում է համացանցում մտավոր սեփականության օբյեկտների նկատմամբ իրավունքների պաշտպանության միջոցները, որոնք պետությունները սահմանում են իրենց օրենսդրության մեջ», - ասվում է հաղորդագրության մեջ։
Համաձայնագրի նախագիծը նախատեսում է դատական վարույթի միջոցով անօրինական բովանդակությանը մուտքը սահմանափակելու միջոցներ, սահմանում է ինտերնետային ռեսուրսների սեփականատերերի պարտավորությունը՝ դատարանի որոշման հիման վրա սահմանափակել նման բովանդակության մուտքը և ստեղծում է էլեկտրոնային գրանցամատյան՝ մուտքը սահմանափակվածտեղեկատվական ռեսուրսները գրանցելու համար: Միևնույն ժամանակ, ըստ մամուլի ծառայության, փաստաթուղթը չի սահմանափակում անդամ պետությունների կողմից դրանով չնախատեսված լրացուցիչ միջոցներ ձեռնարկելու հնարավորությունը:
ԵՏՀ էկոնոմիկայի և ֆինանսական քաղաքականության նախարար Բախիտ Սուլթանովի խոսքով՝ ԵԱՏՄ բոլոր անդամ պետություններն ավարտել են նախագծի ներքին համաձայնեցումը, ինչը վկայում է, որ փաստաթուղթը պատրաստ է ստորագրման։