ԵՐԵՎԱՆ, 16 փետրվարի – Sputnik․ Միլանի ձմեռային օլիմպիական խաղերում Հայաստանը ներկայացնող գեղասահորդներ Կարինա Ակոպովան և Նիկիտա Ռախմանինը քիչ առաջ հրաշալի ելույթ ունեցան՝ վաստակելով 180,66 միավոր։
Ազատ ծրագրում զույգի ելույթը «Միլիոնատերը ետնախորշից» հնդկական հայտնի ֆիլմի երաժշտության ներքո էր։
Նշենք, որ զույգի ելույթը պատմական իրադարձություն է մեր երկրի համար։ Գեղասահքի պատմության մեջ առաջին անգամ է, որ օլիմպիական խաղերում հանդես է գալիս հայկական սպորտային զույգ (2006թ․ իտալական Թուրինում անցկացված Ձմեռային օլիմպիական խաղերում պարային զույգ ենք ունեցել,– խմբ․):
Կարինա Ակոպովա և Նիկիտա Ռախմանին զույգը 2025 թվականից փոխել են քաղաքացիությունը ռուսականից հայկականի։
Հիշեցնենք, որ երեկ՝ փետրվարի 15-ին, կարճ ծրագրում հայ գեղասահորդները փայլուն ելույթ ունեցան Արա Գևորգյանի «Արցախ» երաժշտության ներքո։ Թեպետ Ադրբեջանի բարձրացրած աղմուկից հետո երաժշտության անունը ո՛չ գրվեց, ո՛չ էլ հայտարարվեց, այնուամենայնիվ, այն հնչեց։ Զույգը վաստակեց 66.27 միավոր՝ զբաղեցնելով 12-րդ հորիզոնականը։ Այդպիսով զույգը հաղթահարեց որակավորման փուլն ու իրավունք ստացավ մասնակցելու ազատ ծրագրին: