ԵՐԵՎԱՆ, 13 փետրվարի – Sputnik․ Ավելի քան 30 տարվա ընթացքում առաջին անգամ Ադրբեջանի քաղհասարակության ներկայացուցիչները Հայաստան են եկել ցամաքային սահմանով։ Պետական լրատվամիջոցների փոխանցմամբ՝ ադրբեջանական պատվիրակությունը Հայաստան է ժամանել երկու երկրների միջև եղած ցամաքային սահմանի սահմանազատված և սահմանագծված հատվածով՝ անցնելով բոլոր համապատասխան ընթացակարգերը։
Ադրբեջանցի փորձագետներն առաջին անգամ Հայաստան են եկել ցամաքային սահմանով
© Photo : press office of Public Radio of Armenia
«Սա կարևոր գործնական քայլ է երկու երկրների միջև վստահության ամրապնդման ուղղությամբ»,- նշված է ԶԼՄ–ներին փոխանցված հաղորդագրության մեջ։
Պատվիրակությունը Հայաստան է ժամանել փետրվարի 13-14-ը «Խաղաղության կամուրջ» նախաձեռնության շրջանակում երկկողմ կլոր սեղանին մասնակցելու նպատակով։
Կից հրապարակված են նաև երկու երկրների պատվիրակությունների կազմերը։ Ադրբեջանի քաղհասարակության ներկայացուցիչներից Հայաստան է եկել ընդհանուր 17 մասնակից, այդ թվում՝ լրագրողներ։ Ինչպես հայտնում են, բացի «Խաղաղության կամուրջ» նախաձեռնության հիմնական մասնակիցներից, այս կլոր սեղանին կներգրավվի նաև երկու կողմերից մասնակիցների ավելի լայն խումբ։
Հիշեցնենք՝ 2025թ․ հոկտեմբերի վերջին Երևանում քաղաքացիական հասարակության ներկայացուցիչների, Հայաստանի և Ադրբեջանի ՀԿ-ների ղեկավարների մասնակցությամբ տեղի էր ունեցել երկկողմ կլոր սեղան, որին մասնակցել էր նաև ՀՀ անվտանգության խորհրդի քարտուղար Արմեն Գրիգորյանը: Արդեն նոյեմբերի 21-ին Հայաստանի քաղհասարակության անդամներն էին Բաքու մեկնել (կրկին «Խաղաղության կամուրջ» նախաձեռնության շրջանակում)։