ԵՐԵՎԱՆ, 10 հունվարի – Sputnik. ԲՀԿ առաջնորդ Գագիկ Ծառուկյանը համարում է, որ իր «Առաջարկ Հայաստանին» նախընտրական ծրագիրը քաղաքական, հանրային Նոյյան տապան է լինելու, որտեղ կհավաքվեն բոլոր հետաքրքիր առաջարկները, լուծումները։ Այս մասին հայտարարել է ԲՀԿ առաջնորդը։
Նա նշել է, որ դեռ ամիսներ առաջ հայտարարել է «Առաջարկ Հայաստանին» ծրագրի մեկնարկի մասին` համոզված լինելով, որ պետությունները կորուստներից հետո վերականգնվում են ծրագրերի, գաղափարների, կամքի և երկրին նվիրված, ունակ մարդկանց համախմբման շնորհիվ։
««Առաջարկ Հայաստանին» գաղափարը Նոյյան տապանի պես մի բան է։ Միայնակ փրկվել հնարավոր չէ։ Ոչ մի անհատ, ոչ մի կուսակցություն, ոչ մի դաշինք միայնակ չի կարող մեծ արդյունքի հասնել։ Մեր խնդիրներն այնքան խորն են, վիճակը՝ այնքան բարդ, որ այլ մոտեցում է պետք»,–նշել է նա։
Ծառուկյանի խոսքով` պետք է ստեղծել պետական, գիտական, մասնագիտական մտքի «նոյյան տապան», որտեղ կուսակցական պատկանելությունը ոչ մի նշանակություն չունի, որտեղ հարգի են գիտելիքը, սկզբունքները, մարդկային որակները և պատրաստակամությունը՝ թեկուզ անձնապես տուժել, բայց օգնել երկրին։
«Այսքան ժամանակ որևէ մեկն ինձ չի դիմել ցուցակում այս կամ այն տեղը զբաղեցնելու համար։ Ինձ համար սա շատ կարևոր է։ Ես իմ մեջ ունեի որոշում, որ ով էլ դիմեր նման հարցով՝ անկախ իր արժեքից, իր գիտելիքներից, ասելու էի՝ ցտեսություն, քեզ համար տեղ չկա։ Հիմա մանդատակռվի ժամանակը չէ։ Պաշտո´նը չի կարևոր, երկի´րն է կարևոր, մանդատը չի կարևոր, աշխատանքի արդյո´ւնքն է կարևոր»,–նշել է նա։
Նա բոլոր ցանկացողներին համատեղ աշխատանքի է հրավիրել։