ԵՐԵՎԱՆ, 8 փետրվարի - Sputnik. Թեհրանը Մոսկվային և Պեկինին տեղեկացրել է իրանական միջուկային ծրագրի վերաբերյալ տարաձայնությունների շուրջ ԱՄՆ-ի հետ բանակցությունների ընթացքի և մանրամասների մասին: Այս մասին հայտարարել է Իսլամական Հանրապետության արտաքին գործերի նախարար Աբբաս Արաղչին:
Երեկ Իրանի արտգործնախարարի իրավական և միջազգային հարցերով տեղակալ Քազեմ Ղարիբ-Աբադին X սոցիալական ցանցի իր էջում գրել էր, որ իրանական միջուկային ծրագրի շուրջ Օմանում Թեհրանի և Վաշինգտոնի բանակցությունների հաջորդ օրը Թեհրանում հանդիպել է Ռուսաստանի և Չինաստանի դեսպաններին:
«Մենք շարունակում ենք խորհրդակցությունները Չինաստանի և Ռուսաստանի հետ: Չինաստանն ու Ռուսաստանը երկու բարեկամ երկրներ են և մեր ռազմավարական գործընկերները: Երեկ տեղակալս հանդիպել է Չինաստանի և Ռուսաստանի դեսպաններին ու նրանց տեղեկացրել բանակցությունների ընթացքի և մանրամասների մասին: Մենք կշարունակենք խորհրդակցել նրանց հետ»,-իրանցի նախարարի խոսքը մեջբերում է IRNA գործակալությունը:
Արտգործնախարարն այս մասին հայտարարել է Օմանի Մասկատ քաղաքում ԱՄՆ-ի և Իրանի պատվիրակությունների` միջուկային ծրագրի շուրջ բանակցություններից 2 օր անց։
Օմանի միջնորդությամբ կողմերի հանդիպումն առաջինն էր բանակցային գործընթացում ամիսներ տևած դադարից հետո, որն առաջացել էր 2025 թվականի հունիսին իրանա-իսրայելական հակամարտության պատճառով։ Մինչ այդ պահը Իրանն ու ԱՄՆ-ն խորհրդակցությունների հինգ փուլ էին անցկացրել:
Հունվարի 28-ին ԱՄՆ նախագահ Դոնալդ Թրամփը հայտարարել էր, որ ամերիկյան նավերի «արմադան» ճանապարհ է ընկել դեպի Իրան: Նա հույս էր հայտնել, որ Թեհրանը կհամաձայնի բանակցությունների սեղանի շուրջ նստել և «գործարք» կնքել, որը ենթադրում է միջուկային զենքից լիակատար հրաժարում։