ԵՐԵՎԱՆ, 8 փետրվարի - Sputnik. Ռուսաստանցի հայ ջութակահար ու կոմպոզիտոր Էդգար Հակոբյանը գեղասահորդ Պյոտր Գումեննիկին հաճույքով է տրամադրել իր «Waltz 1805» ստեղծագործության օգտագործման իրավունքը՝ Միլանում և Կորտինա դ'Ամպեցոյում անցկացվող 2026 թվականի Օլիմպիական խաղերի կարճ ծրագրում ելույթ ունենալու համար: Այս մասին նա պատմել է ՌԻԱ Նովոստիին:
Երեկ հայտնի դարձավ, որ Օլիմպիական խաղերի կարճ ծրագրում Գումեննիկին չեն թույլատրել օգտագործել «Պարֆյումեր» ֆիլմի երաժշտությունը՝ հեղինակային իրավունքի պատճառով: Չմշկասահորդների միջազգային միության (ISU) մամուլի ծառայությունից ՌԻԱ Նովոստիին հայտնել են, որ Գումեննիկը, ինչպես և մյուս գեղասահորդները, անձնական պատասխանատվություն են կրում ծրագրերում օգտագործվող երաժշտության հեղինակային իրավունքների պահպանման համար:
«Երկար տարիներ իմ ստեղծագործությունը սերտորեն կապված է այս հրաշալի մարզաձևի հետ: Համապատասխանաբար, իմ գրած երաժշտության մեջ ի սկզբանե դնում եմ սահքի հնարավորությունը: Ստեղծված իրավիճակի հետ կապված ընտրությունը կանգ առավ այս ստեղծագործության վրա, որի իրավունքները ես հաճույքով տրամադրեցի: Ինձ համար միայն մի բան նշանակություն ունի՝ մեր Պյոտրի և Ադելիայի հաջողությունը: Երկրպագում ենք մերոնց: Միայն առաջ»,-ասել է Հակոբյանը:
Տղամարդիկ կարճ ծրագիրը կներկայացնեն փետրվարի 10-ին: Կանանց մենասահքում Ռուսաստանը կներկայացնի Ադելիա Պետրոսյանը, որը Օլիմպիադայում ելույթները կսկսի փետրվարի 17-ին:
Այս օլիմպիական մրցաշրջանում Չմշկասահորդների միջազգային միության պահանջները հեղինակային իրավունքների պահպանման վերաբերյալ խստացվել են, ինչը մի շարք միջադեպերի է հանգեցրել մրցաշարի մասնակիցների շրջանում: Սա վկայում է կանոնակարգի փոփոխությունների համակարգային բնույթի և երաժշտական ուղեկցության իրավական կողմերի նկատմամբ կազմակերպիչների խիստ ուշադրության մասին: