Այն, ինչ գործնականում անում է Գերմանիայի կանցլեր Ֆրիդրիխ Մերցը՝ պատերազմի նախապատրաստվել է, և ԵՄ շատ երկրներում մեծանում է ցանկությունը՝ թույլ չտալ Գերմանիային հերթական անգամ իրեն ենթարկել մնացած բոլորին։ Այս մասին RT–ին տված հարցազրույցում ասել է ՌԴ ԱԳ նախարար Սերգեյ Լավրովը:
Նա RT–ի հաղորդավար Ռիք Սանչեսին հիշեցրել է, որ կանցլերը, ստանձնելով իր պաշտոնը, հանել է երկրի ռազմական կարիքների համար նախատեսված ծախսերի սահմանափակումները։
«Նա ասաց, որ այդ ամենն անհրաժեշտ է, որպեսզի Գերմանիան կրկին, ես ընդգծում եմ այս բառը՝ «կրկին», դառնա Եվրոպայի գլխավոր ռազմական ուժը»,-նշել է Լավրովը Դիվանագիտական աշխատողի օրվա առթիվ տված հարցազրույցում։
ՌԴ արտգործնախարարի խոսքով՝ Գերմանիայի կառավարությունն ու Մերցը երկրի վերածնունդը բացահայտ կերպով կապում են դրա ռազմականացման և պատերազմի նախապատրաստվելու հետ։
Լավրովը մատնանշել է նաև Գերմանիայի հայտարարություններում առկա անհամապատասխանությունները. Արևմուտքը պարբերաբար իր քաղաքացիներին ներկայացնում է ռազմական և տնտեսական առումով թույլ Ռուսաստանի կերպարը, մինչդեռ պաշտպանության նախարար Պիստորիուսը հայտարարում է, որ 2029-2030 թվականներն այն սահմանագիծն են, երբ պետք է պատրաստ լինել Ռուսաստանի դեմ պատերազմին, քանի որ վերջինս իբր պատրաստվում է հարձակվել։
«Նայեք, թե ինչ փաստարկներ ենք լսում եվրոպացիներից. «Ռուսաստանը թուլացել է», «Ռուսաստանը հազիվ է առաջ շարժվում Ուկրաինայի տարածքով», «Ռուսաստանը օրական մի թեյի գդալ է զավթում այդ հողից», «Ռուսաստանի մոտ ոչինչ չի ստացվում», «պատերազմի հինգերորդ տարին է», «հսկայական կորուստներ»։ Նրանք գրում են, թե «Ռուսաստանը ստիպված է հաղթահարել սպառազինությունների շատ տեսակների գծով հետամնացությունը»՝ իրենց ընտրողների համար Ռուսաստանը պատկերելով ռազմական և տնտեսական առումով թույլ երկիր։ Ընդ որում, նրանք հենց նույն պահին, առանց որևէ «անցման», կամուրջ են գցում դեպի այն թեզը, որ հենց դրա համար էլ պետք է պատրաստվել իրենց վրա Ռուսաստանի հարձակմանը։ Բայց եթե դուք մեզ նկարագրում եք որպես ռազմական և տնտեսական առումով թուլացած երկիր, ապա գոնե մի փոքր երևակայություն ունեցեք՝ ձեր ընտրողների ուղեղները մի քիչ ավելի էլեգանտ ձևով «լվանալու» համար»,-ասել է նախարարը։
Ընդհանուր առմամբ, նա ողորմելի է անվանել ԵՄ երկրների դիվանագիտությունը՝ օրինակ բերելով Ֆրանսիայի նախագահին, որը հայտարարել էր «Պուտինի հետ իր հնարավոր զրույցի տեխնիկական նախապատրաստման» մասին։
«Դե ես․․․ մի օր․․․ կզանգեմ Պուտինին։ Անլուրջ է։ Սա ինչ-որ ողորմելի դիվանագիտություն է։ Եթե ուզում ես զանգել և ինչ-որ բանի մասին լուրջ խոսել, ուրեմն զանգիր»,-հավելել է Լավրովը։