ԱՄՆ-ն պատրաստ է աշխատել Ռուսաստանի, Չինաստանի և այլ երկրների հետ, որպեսի աշխարհում կրճատվի միջուկային զենքի քանակը։ Այս հայտարարությունն արել է ԱՄՆ փոխնախագահ Ջեյ Դի Վենսը ԱՄՆ-ի և Ռուսաստանի միջև ռազմավարական հարձակողական սպառազինությունների կրճատման մասին պայմանագրի գործողության ժամկետի դադարեցման ֆոնին։
«Մենք կհամագործակցենք Ռուսաստանի, Չինաստանի և ցանկացած այլ երկրի հետ՝ բարեկամ թե մրցակից՝ փորձելու համար կրճատել միջուկային զենքի քանակը։ Կարծում եմ՝ սա ամենակարևորն է, որ կարող էիք անել խաղաղության և կայունության համար», – ասել է նա լրագրող Մեգին Քելլիին տված հարցազրույցում։
Վենսի խոսքով՝ Վաշինգտոնի դիրքորոշումն այն է, որ Իրանին արգելվի միջուկային զենք ունենալ։ Նա նշել է, որ եթե իրանցիները միջուկային զենք ստանան, հաջորդ օրը այն կստանա Սաուդյան Արաբիան։
«Այնուհետև ևս ինչ–որ մեկը՝ Պարսից ծոցի արաբական պետություններից։ Ու այսպես մենք կունենանք միջուկային զենքի համաշխարհային տարածում։ Աշխարհում անվտանգության ամենամեծ սպառնալիքն այն է, որ շատ մարդիկ միջուկային զենք ունեն», – հավելել է նա։
Հիշեցնենք` փետրվարի 5-ին ԱՄՆ–ի և Ռուսաստանի միջև դադարեց գործել ռազմավարական հարձակողական սպառազինությունների կրճատման մասին պայմանագիրը։ ՄԱԿ-ի գլխավոր քարտուղար Անտոնիո Գուտերեշը մտահոգություն է հայտնել այդ կապակցությամբ։