ԵՐԵՎԱՆ, 30 հունվարի - Sputnik. Երևանի հարցումներն օպերատիվ կերպով մշակվում են։ Այս մասին ճեպազրույցի ժամանակ ասել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով դեպի Թուրքիա և Ադրբեջան տանող երկաթուղային հատվածները վերանորոգելու մասին Հայաստանի խնդրանքը:
«Ռուսաստանը կապի մեջ է հայ գործընկերների հետ, այդ թվում՝ տնտեսական մասով։ Երևանի բոլոր հարցումները օպերատիվ կերպով մշակվում են պատկան գերատեսչությունների կողմից», - ասել է Զախարովան։
Ինչ վերաբերում է «Թրամփի ուղուն», ապա, նրա խոսքով, Մոսկվան հաստատում է դրան միանալու հնարավոր տարբերակները ուսումնասիրելու պատրաստակամությունը՝ հաշվի առնելով «Ռուսական երկաթուղիների» եզակի փորձը: Դրա հետ մեկտեղ, նախ հարկ է ուշադիր ծանոթանալ այս նախաձեռնության իրականացման և գործունեության մանրամասներին: Իսկ մշակումը, ինչպես նշել է Զախարովան, դեռևս սկզբնական փուլում է։
«Ուժի մեջ է մնում բոլոր շահագրգիռ գերատեսչությունների մասնակցությամբ առարկայական խորհրդակցություններ անցկացնելու մասին մեր առաջարկը, որ արել ենք Երևանին», - ասել է Զախարովան:
Ավելի վաղ ՀՀ վարչապետ Նիկոլ Փաշինյանը խնդրել էր Ռուսաստանին հնարավորինս արագ որոշում կայացնել Հայաստանում դեպի Ադրբեջանի և Թուրքիայի սահմաններ տանող երկաթուղու հատվածների վերականգնման հարցով:
Նրա խոսքով, եթե ինչ-ինչ պատճառներով ռուսաստանցի գործընկերները չցանկանան ներդրումներ կատարել, ապա Հայաստանը կվերցնի դրանք կոնցեսիայից՝ ինքն իրականացնելով վերանորոգումը: