ԵՐԵՎԱՆ, 29 հունվարի - Sputnik. ԱՄՆ-ի և Իրանի միջև գլխավոր տարաձայնությունը իրանական բալիստիկ հրթիռների հեռահարությունը սահմանափակելու՝ Վաշինգտոնի պահանջն է։ Այս մասին հայտնում է CNN հեռուստաալիքը՝ հղում անելով իր աղբյուրներին:
Ավելի վաղ «New York Times» թերթը, հղում անելով իր աղբյուրներին, հայտնել էր, որ Իրանի շուրջ լարվածության թուլացմանն ուղղված բանակցություններում անցած շաբաթ արդյունք չի եղել, քանի որ Թեհրանը նախկինի պես հրաժարվում է զիջել Թրամփի պահանջներին:
«Ամենախնդրահարույց հարցը ԱՄՆ-ի պահանջն էր, որպեսզի Իրանը համաձայնի սահմանափակել իր բալիստիկ հրթիռների հեռահարությունը», - ասվում է հաղորդագրության մեջ:
Աղբյուրների տվյալներով՝ Իրանը հրաժարվել է կատարել ԱՄՆ-ի պահանջը և հայտարարել է, որ քննարկելու է միայն իր միջուկային ծրագիրը:
Հրապարակման համաձայն՝ Իրանի բալիստիկ հրթիռներն ամենից շատ անհանգստացրել են Իսրայելին, որը 2025 թվականի հունիսին Իրանի հետ հակամարտության սրման ժամանակ իր հակահրթիռային պաշտպանության միջոցների զգալի մասը ծախսել է իրանական հրթիռները որսալու վրա:
Հիշեցնենք` Իրանում բողոքի զանգվածային ակցիաներ էին անցկացվում 2025–ի դեկտեմբերի 28-ից։ Դժգոհության հիմնական պատճառները փոխարժեքի տատանումներն են ու գների բարձրացումը։ Սակայն ավելի ուշ Իրանի մի շարք քաղաքներում բողոքի ակցիաները վերաճեցին ոստիկանության հետ բախումների, իսկ կարգախոսները ստացան քաղաքական բնույթ՝ ընդդեմ Իրանում առկա քաղաքական կարգի:
Հունվարի 2-ին ԱՄՆ նախագահ Դոնալդ Թրամփը հայտարարեց, թե ԱՄՆ–ն պատրաստ է պաշտպանել Իրանի քաղաքացիներին, եթե այդ երկրի իշխանությունները ուժ կիրառեն նրանց դեմ: Թեհրանը դատապարտեց այդ սպառնալիքները։
Հունվարի 8-ին Իրանում տեղի ունեցան ամենամասշտաբային բողոքի ցույցերը, որոնք հրահրվել էին 1979 թվականին տապալված շահի որդու՝ Ռեզա Փահլավիի կոչով: Այնուհետև փողոց էին դուրս եկել գործող իշխանության կողմնակիցները։