ԵՐԵՎԱՆ, 27 հունվարի - Sputnik. Ձյան առատ տեղումների պատճառով Մոսկվայի ժամանակով ժամը 9.00-ից մինչև 12.00-ն «Շերեմետևո» օդանավակայանը փակ է ինքնաթիռների ժամանման համար։ Այս մասին հայտնել են օդանավակայանի մամուլի ծառայությունից:
Ռուսաստանի ԱԻ նախարարության Մոսկվայի գլխավոր վարչությունն ավելի վաղ հայտնել էր, որ ՌԴ մայրաքաղաքում հունվարի 27-ի ժամը 00.00-ից մինչև հունվարի 29-ի ժամը 12.00-ն սպասվում է առատ ձյուն, մերկասառույց և բուք: Օդերևութաբանների տվյալներով՝ այսօր Մոսկվայում տեղալու է ամսական նորմայի ավելի քան մեկ երրորդը։
«Կապված անբարենպաստ եղանակային պայմանների հետ՝ Մոսկվայի ժամանակով ժամը 09.00-ից մինչև ժամը 12.00-ն «Շերեմետևո» օդանավակայանը ժամանակավորապես փակվել է օդանավերի ժամանման համար», - ասվում է հաղորդագրության մեջ:
Ավիաընկերությունները կարգավորում են թռիչքների ժամանակացույցը։ Ուղևորները կարող են թռիչքների կարգավիճակի վերաբերյալ տեղեկատվությունն իմանալ կոնտակտային կենտրոններում և ավիաընկերությունների և օդանավակայանի հաղորդակցման ուղիներով: