ԵՐԵՎԱՆ, 26 հունվարի - Sputnik. Արագածոտնի թեմի առաջնորդ Մկրտիչ եպիսկոպոս Պռոշյանի կալանքի ժամկետը 1 ամսով երկարացվեց` վերացնելով բոլոր սահմանափակումները։ Որոշումը հրապարակեց նիստը նախագահող դատավոր Դավիթ Դաբաղյանը։
Նշենք, որ Արագածոտնի թեմի առաջնորդ Մկրտիչ եպիսկոպոս Պռոշյանի գործով առաջին դատական նիստում հանրային մեղադրող Տիգրան Մուրադյանն այսօր միջնորդություն էր ներկայացրել` առաջարկելով Մկրտիչ սրբազանի կալանքը երկարաձգել 3 ամսով։ Դատարանը դատախազի միջնորդությունը բավարարեց մասնակի
Նշենք, որ մինչ այդ Մկրտիչ սրբազանին արգելված էին տեսակցությունները` բացառությամբ մոր, դատարանն այսօր վերացրեց այդ սահմանափակումները։
Նշենք, որ մինչ դատարանի որոշման հրապարակումը գործող տուժող ճանաչված Ստեփան Ասատրյանը (նախկինում՝ տեր Արամ) և Արամայիս Թախմազյանը (նախկինում` տեր Թադե), չպատասխանեցին դատարանի հարցին` արդյոք Մկրտիչ սրբազանը կարող է խոչընդոտել նրանց ազատության մեջ։
«Օգտվում եմ իր իրավունքից և չեմ պատասխանում այդ հարցին։ Դուք դատավոր եք և ավելի լավ գիտեք»,– ասաց Ստեփան Ասատրյանը։
Հիշեցնենք` Մկրտիչ եպիսկոպոս Պռոշյանը կալանավորված է 2025–ի հոկտեմբերի 16-ից։ Նրա նկատմամբ հանրային քրեական հետապնդում է հարուցվել ՔՕ 2 հոդվածներով՝ պաշտոնեական դիրքն օգտագործելով ընտրական իրավունքի իրականացումը խոչընդոտելը, իշխանական կամ ծառայողական լիազորություններն օգտագործելով հավաքներին մասնակցելուն հարկադրելը։
Քրեական վարույթը հարուցվել է Արագածոտնի թեմի քահանա Արամ Ասատրյանի (հետագայում նա կարգալույծ արվեց` ստանալով իր ավազանի անունը` Ստեփան Ասատրյան)` Հանրային հեռուստաընկերության եթերում հնչեցրած արտահայտությունների հիման վրա (Ասատրյանն ասել էր, որ թեմի առաջնորդն իրեն և մյուս քահանաներին ստիպել է 2021 թվականին մասնակցել ընդդիմության բողոքի ակցիաներին): «Իրազեկ քաղաքացիների միավորում» ՀԿ-ի նախագահ Դանիել Իոաննիսյանն է դիմել ՀՀ գլխավոր դատախազություն՝ ուշադրություն հրավիրելով քահանայի հայտարարությունների վրա։