ԵՐԵՎԱՆ, 26 հունվարի - Sputnik. Իրանի արտաքին գործերի նախարար Աբբաս Արաղչիի և ԱՄՆ նախագահի հատուկ բանագնաց Սթիվ Ուիտկոֆի միջև իրականացվում է ուղերձների փոխանակում: Այս մասին Ժնևում հայտարարել է ՄԱԿ-ում Իրանի դեսպան և մշտական ներկայացուցիչ Ալի Բահրեյնին։
«Մեր արտգործնախարարի և Ուիտկոֆի միջև տեղի է ունենում տարբեր հարցերի շուրջ հաղորդագրությունների ոչ պաշտոնական փոխանակում, սակայն դա դժվար թե կարելի է բանակցություններ անվանել», - հայտարարել է Բահրեյնին, որի խոսքերը մեջբերում է իրանական ISNA գործակալությունը:
Հիշեցնենք` ԱՄՆ նախագահ Դոնալդ Թրամփը հունվարի 22-ին հայտարարել էր, որ ԱՄՆ ռազմածովային ուժերի նավերը «ամեն դեպքում» շարժվում են դեպի Իրան: Դրանից առաջ նա չէր կարողացել որոշակի պատասխան տալ հարցին, թե արդյոք օրակարգից դուրս է եկել Իրանին ռազմական միջամտության տարբերակը՝ նշելով միայն, որ չի կարող ասել, թե ինչ կլինի ապագայում։
Ավելի վաղ Թրամփն աջակցել էր Իրանի ցուցարարներին՝ հնարավոր գտնելով Իսլամական Հանրապետության դեմ գործողությունների ցանկացած, այդ թվում՝ օդային հարվածների տարբերակը: Թեհրանում իրենց հերթին հայտարարել էին, որ ԱՄՆ նախագահի հայտարարությունները սպառնում են Իսլամական Հանրապետության ինքնիշխանությանը: