ԵՐԵՎԱՆ, 23 հունվարի - Sputnik. «Հայրենիք» կուսակցության երիտթևը ԵՄ պատվիրակության երևանյան գրասենյակի դիմաց բողոքի ակցիա է իրականացնում` պահանջելով արձագանքել Հայաստանում քաղբանտարկյալների խնդրին։
Կուսակցության գործադիր մարմնի անդամ Բաբկեն Հարությունյանը լրագրողների հետ զրույցում նշեց, որ «Հայրենիքի» նկատմամբ ճնշումներ են իրականացվում։ Նա հիշեցրեց, որ կալանքի տակ են «Հայրենիք» կուսակցության գլխավոր քարտուղար Խաչիկ Գալստյանը, ինչպես նաև Վաղարշապատի տարածքային պատասխանատու Արամ Քոչարյանը։
«Մենք հրավիրում ենք ԵՄ-ի ուշադրությունը նշված հարցի վրա, ցանկանում ենք նաև` հանրությունն ավելի լավ տեղյակ լինի նման իրադարձություններից։ Նամակ ենք փոխանցում ԵՄ-ին ու սրանով փորձում ենք իրացնել քաղբանտարկյալների իրավունքները»,- նշեց Հարությունյանը։
ԵՄ անվտանգության պատասխանատուն դուրս եկավ ու վերցրեց ակցիայի մասնակիցների բերած նամակը` խոստանալով փոխանցել այն համապատասխան բաժին։
Փաստաբան Արսեն Բաբայանն էլ նշեց, որ եվրոպական կառույցներից ակնկալում են, որպեսզի լայն բացեն իրենց աչքերը։ Ըստ փաստաբանի՝ ԵՄ-ն, որը ջանք չի խնայում դատական և իրավական համակարգը բարեփոխելու համար, պետք է հակառակ կողմից էլ տեսնի, թե ինչ է կատարվում։
Բաբայանը նաև հայտնեց, որ հունվարի 22-ին տեսակցել է «Հայրենիք» կուսակցության գլխավոր քարտուղար Խաչիկ Գալստյանին։
«Չկա որևէ տվյալ, փաստ, որը հիմնավոր կասկածի նվազ շեմով կարող էր նման լինել հանցագործություն կատարելու դեպքին։ Գալստյանին կալանքի տակ պահելու որևէ հիմք գոյություն չունի՝ սկսած իր կենսագրությունից, անցած ուղուց։ Չնայած մենք համաձայն չենք, որովհետև հիմնավոր կասկածի շեմը հաղթահարված չէ, բայց նույնիսկ այդ դեպքում էլ այլընտրանքային խափանման միջոցներ կարելի էր կիրառել»,- ասաց Բաբայանը։
Նա շեշտեց՝ սա խոսում է իշխանությունների կողմից քաղաքական ու հանրային գործիչների, ինչպես նաև ընդդիմադիր կեցվածքով անձանց նկատմամբ քաղաքական հետապնդումների մոլուցքի մասին։ Բաբայանը վստահ է՝ սա արվում է, որպեսզի ընտրություններից առաջ վախի մթնոլորտ ստեղծվի ու բոլորը մտածեն՝ իշխանություններին հակառակ կարծիք արտահայտելու դեպքում կբանտարկվեն։
Հիշեցնենք, որ Խաչիկ Գալստյանը մեղադրվում է Վաղարշապատի ընտրություններում ընտրակաշառք բաժանելու մեջ։ Գալստյանը ձերբակալվել է դեկտեմբերի 29-ի լույս 30-ի գիշերը, կալանավորվել դեկտեմբերի 30-ին՝ 2 ամսով։