Մեկուսարանում հացադուլի մեջ գտնվող Սամսոնյանի համար շտապօգնություն են կանչել. փաստաբան

ԵՐԵՎԱՆ, 18 հունվարի – Sputnik. «Արմավիրի» ՔԿՀ–ում հացադուլի մեջ գտնվող Antifake.am-ի «Իմնեմնիմի» հաղորդաշարի համահեղինակ Նարեկ Սամսոնյանի համար շտապօգնություն են կանչել։ Այդ մասին «Ֆեյսբուքի» իր էջում գրառում է արել փաստաբան Ռուբեն Մելիքյանը։

Նա հիշեցրել է, որ այսօր Նարեկ Սամսոնյանի հացադուլի 10-րդ օրն է։ Բացի այդ, նրա մոտ ախտորոշվել է առողջական լուրջ խնդիր։

Ավելի ուշ Ռուբեն մելիքյանը հայտնել է, որ շտապօգնության անձնակազմը որոշեց Նարեկին տեղափոխել «Էջմիածին» բժշկական կենտրոն։

Հիշեցնենք` դիմակավորված ուժայինները նոյեմբերի 13-ի առավոտյան ներխուժեցին «Իմնեմնիմի» հաղորդաշարի հեղինակներ Նարեկ Սամսոնյանի և Վազգեն Սաղաթելյանի տներ և ձերբակալեցին նրանց։ Դրանից հետո «Անտիֆեյքի» գրասենյակում խուզարկություններ իրականացվեցին, առգրավվեց ամբողջ տեխնիկան։

Նարեկ Սամսոնյանի և Վազգեն Սաղաթելյանի դեմ քրեական վարույթ է նախաձեռնվել ՀՀ ԱԺ նախագահ Ալեն Սիմոնյանի վիրավորանքին արձագանքելու համար։ Նրանք մեղադրվում են «Խուլիգանություն՝ հաղորդակցման միջոցների օգտագործմամբ» հոդվածի հատկանիշներով։ Ավելի ուշ Սամսոնյանն ու Սաղաթելյանը կալանավորվեցին։

Հունվաի 9-ին դատարանը 3 ամսով երկարացրեց նրանց կալանքը։