Ֆրանսիական France TV-ն հրապարակել է Ֆրանսիայի և Ուկրաինայի նախագահներ Էմանուել Մակրոնի, Վլադիմիր Զելենսկու, ԱՄՆ նախագահ Դոնալդ Թրամփի հեռախոսազրույցի տեսագրությունը։
Տեսագրության սկզբում Մակրոնը Կիևից զանգում է Թրամփին և խնդրում մի քանի րոպեից կրկին կապ հաստատել, որ զրույցին միանան նաև Զելենսկին ու եվրոպացի առաջնորդները։ Մակրոնը բացատրում է, որ Զելենսկին համաձայն է 30-օրյա հրադադարի, պատրաստ է այդ մասին հայտարարել հեռախոսով։
«Ալո, Դոնալդ, մենք Կիևում ենք։ Ես, Զելենսկին, վարչապետ (Մեծ Բրիտանիայի․ խմբ.) Կիր Սթարմերը, նախագահ (Լեհաստանի․ խմբ.) Դոնալդ Տուսկը և կանցլեր (Գերմանիայի․ խմբ.) Ֆրիդրիխ Մերցը։ Մենք միասին ենք և շատ լավ բանակցություններ անցկացրինք առավոտյան: Եվ մենք բոլորս աջակցում ենք 30 օրով անվերապահ հրադադարի Ձեր առաջարկին»,- ասում է Է Մակրոնը տեսագրության հաջորդ հատվածում, երբ արդեն երկրորդ անգամ են զանգել Թրամփին։
Այնուհետև Զելենսկին կոչ է անում պատժամիջոցներ կիրառել Ռուսաստանի դեմ, եթե Մոսկվան չհամաձայնի այդ առաջարկին, և հետաքրքրվում է, թե ինչ կարծիք ունի Թրամփը։ ԱՄՆ-ի առաջնորդն ասում է, որ Ռուսաստանը կընդունի առաջարկը, և այդ ծրագիրը կաշխատի։
2025 թվականի մայիսին Ռուսաստանի նախագահ Վլադիմիր Պուտինը հայտնել էր, որ Թուրքիայի ղեկավար Ռեջեփ Թայիփ Էրդողանի հետ կքննարկի Ստամբուլում Ուկրաինայի հետ բանակցություններ անցկացնելու հնարավորությունը։ Ռուսաստանի ղեկավարը նաև Կիևի իշխանություններին առաջարկել էր մայիսի 15-ին Ստամբուլում վերսկսել ուղիղ բանակցությունները՝ առանց որևէ նախապայմանի: Հետագայում Թուրքիայի նախագահն աջակցեց Պուտինի նախաձեռնությանը՝ հայտարարելով, որ պատրաստ է տրամադրել ստամբուլյան հարթակը։