ԵՐԵՎԱՆ, 12 հունվարի - Sputnik. Մեր երկրում արդարության և արդարադատության համար պատասխանատվությունը կրում են կանայք։ Այսօր դատական գործերի ժամկետների մասին պանելային քննարկման ժամանակ այս մասին ասաց ՀՀ վարչապետ Նիկոլ Փաշինյանը։
«Այնպես է ստացվել, որ կանայք մեր երկրի բնակչության մեծամասնությունն են, և դա էլ լեգիտիմության հետ կապ ունի։ Ես հավատում եմ, որ կանանց շրջանում կոռուպցիոն մենթալիտետն ավելի պակաս է, քան տղամարդկանց, ու դա, իմ կարծիքով, ունի շատ կոնկրետ պատճառ․ քրեական ենթամշակույթի համար կանայք էականորեն պակաս հասանելի են, քան տղամարդիկ»,- հայտարարեց Փաշինյանը։
Նրա դիտարկմամբ՝ տղամարդկանց մասնակցությամբ անգամ ամենապատկառելի միջավայրում խոսույթում կարող են այնպիսի բառեր կիրառվել, որոնք ոչ մի կերպ ընդունելի չեն։
«Եկեք տղավարի էս հարցը լուծենք․․․ Ի՞նչ է նշանակում։ Դա ցանկացած մեկնաբանություն ունի, բայց դա կապ չունի իրավունքի, իրավակարգի, սահմանադրականության հետ։ Որ այդպես լիներ, կասեինք՝ արի սահմանադրավարի էս հարցը լուծենք, ինչի՞ ենք ասում՝ եկեք տղավարի էդ հարցը լուծենք․․․ Ես էդ բանի հետ չեմ հաշտվում, որ նորածին երեխային դեռ պապիկին հայհոյելու կուլտուրան են սովորեցնում։ Բայց ես չեմ պատկերացնում, որ մայրիկն ասի՝ հլը հայրիկին կամ պապիկին հայհոյի․․․ Սա կոչ է մեզ՝ տղամարդկանց, եկեք էս բանի մասին մտածենք»,- ասաց Փաշինյանը։
Վստահ է, որ թեպետ քրեական ենթամշակույթի դեմ պայքարում իրավապահ համակարգը կարևոր դեր ունի, բայց գլխավոր լուծումներից մեկը կրթությունն է։