ԵՐԵՎԱՆ, 11 հունվարի – Sputnik. Հայաստանում գործարկվել է ստարտափ, որն արհեստական բանականության (ԱԲ) միջոցով որոշում է բանկերի, ինչպես նաև մասնավոր և պետական հաստատությունների այցելուների բավարարվածության մակարդակը: Այս մասին Sputnik Արմենիայի հետ զրույցում ասաց «SatisfAI» ստարտափի համահիմնադիր Հայկ Կարապետյանը, որը նախկինում զբաղեցնում էր «Հայփոստ» փոստային օպերատորի գլխավոր տնօրենի պաշտոնը։
Հայկ Կարապետյան
© Sputnik / Aram Gareginyan
Գնահատման համար օգտագործվում է ԱԲ մոդել, որը վերլուծում է հաճախորդի և աշխատողի շփման տեսագրությունը: Կարապետյանի խոսքով՝ պրոդուկտն արդեն կիրառում են մի քանի բանկեր և հեռահաղորդակցության մեկ օպերատոր։
Կարապետյանը նշեց, որ նախկինում հաճախորդների կարծիքը հավաքագրվում էր պատահական հարցումների միջոցով։ Հարցումները սովորաբար անցկացվում էին նրանց շրջանում, ովքեր վերջին մի քանի ամիսների ընթացքում օգտվել էին ծառայությունից: Դժգոհության պատճառները բացահայտելու միջոցով հաճախորդներին պահպանելու այս մոտեցման արդյունավետությունը միջինում չի գերազանցում 1%-ը:
Հետագայում ընկերություններն անցել են «տաք հետքերով» հարցումների։ Օրինակ՝ սպառողական վարկի ձևակերպումից հետո հաճախորդին զանգում են 5-10 րոպե անց, իսկ հիփոթեքի դեպքում՝ երեք օրվա ընթացքում: Այս մոտեցման արդյունավետությունը գնահատվում է մոտ 13%:
Նոր տեխնոլոգիայի կիրառումը, Կարապետյանի խոսքով, պետք է բարձրացնի այդ ցուցանիշը, քանի որ համակարգը վերլուծում է ոչ միայն բառերը, այլև առոգանությունը, ինչպես նաև հաճախորդի դեմքի արտահայտությունը:
«Ընկերություններն ուշադրություն են դարձնում դրան, քանի որ դժգոհ հաճախորդների մեծ մասը չի բողոքում, այլ պարզապես լուռ հեռանում է: Միաժամանակ մեկ նոր հաճախորդի ներգրավումը մարկետինգային ծախսերի տեսանկյունից միջինում հինգ անգամ թանկ է, քան գործող հաճախորդին պահպանելը», - նշեց Կարապետյանը:
Համակարգը թեստային ռեժիմով կիրառվել է քաղաքապետարանի նամակների և բողոքների բաժնում։
Կարապետյանը հավելեց՝ մոտ ապագայում Հայաստանի թվային համակարգերի գործակալությունը, որը համակարգում է էլեկտրոնային պետական ծառայությունները, նախատեսում է անցկացնել օգտատերերի հետադարձ կապի զարգացման նախագծերի մրցույթ, և «SatisfAI» ստարտափը մտադիր է մասնակցել դրան։