ԵՐԵՎԱՆ, 5 հունվարի - Sputnik. Իրանի զինված ուժերը գտնվում են բարձր մարտական պատրաստության կարգավիճակում և ուժեղացնում են անվտանգության միջոցառումները՝ Իսրայելի կողմից հնարավոր նոր հարձակման ֆոնին։ Այս մասին հայտարարել է Իրանի արտաքին գործերի նախարարության խոսնակ Էսմայիլ Բաղային ամենշաբաթյա մամուլի ասուլիսի ժամանակ, հայտնում է IRNA լրատվական գործակալության։
«Հոգեբանական ճնշումը որպես թշնամու ռազմավարության տարր մեզ համար նորություն չէ։ Մենք հետևում ենք այլ պետությունների գործողություններին առավել զգոնությամբ։ Իրանի զինված ուժերը պատրաստ են պաշտպանել երկրի ինքնիշխանությունը՝ առանց որևէ թուլության», - ընդգծել է նա։
Մեկնաբանելով Իսրայելի վարչապետ Բենիամին Նեթանյահուի հայտարարությունները Իրանի բողոքի ցույցերին աջակցելու մասին՝ Բաղային նշել է, որ Իրանի ժողովուրդն արդեն իսկ նմանատիպ «աջակցություն» զգացել է անցյալ ամռանը 12-օրյա պատերազմի ժամանակ։
«Իրանի բարձրաստիճան պաշտոնյաների և միջուկային գիտնականների սպանությունները, ինչպես նաև սիոնիստական ռեժիմի և նրա գործընկերների կողմից կատարված այլ հանցագործությունները չեն կարող մոռացվել», - հայտարարել է արտաքին գործերի նախարարության խոսնակը։
Իրաքի կողմից Այն ալ Ասադ ավիաբազայից ամերիկյան զորքերի դուրսբերման վերաբերյալ հայտարարության վերաբերյալ Բաղային նշել է, որ այդ գործընթացն իրականացվում է Բաղդադի և Վաշինգտոնի միջև կնքված համաձայնագրերի շրջանակներում և որևէ կապ չունի Իրանի դեմ հնարավոր ագրեսիայի հետ։