ԵՐԵՎԱՆ, 25 դեկտեմբերի – Sputnik. Այն մեղադրանքը, որն առաջադրվել է Գյումրու քաղաքապետին, դատախազությունը պետք է առաջադրի նաև այդ ժամանակաշրջանում պաշտոնավարած մարզպետներին։ Այսօր Հակակոռուպցիոն դատարանում իր գործով դատական նիստի ժամանակ հայտարարեց Գյումրու քաղաքապետ Վարդան Ղուկասյանը։
«Որովհետև մարզպետարանները վերահսկել են քաղաքապետարանի ամբողջ գործունեությունը և քաղաքաշինության բաժինը։ Ինչ փաստաթուղթ եղել է քաղաքապետարանում, երկրորդ օրինակը եղել է մարզպետարանում։ Նույն հոդվածով պետք է մեղադրեք նաև քաղաքաշինության նախարարին, ՏԿԵ և ֆինանսների նախարարներին, վերահսկողական ծառայության պետերին և վարչապետի աշխատակազմի վերահսկողության պետերին, Վերահսկիչ պալատին, որոնք տարին մի քանի անգամ ստուգել են քաղաքապետարանի գործունեությունը»,– ասաց Ղուկասյանը։
Նա պահանջեց վերահսկող կառույցներից, որ ներկայացնեն արձանագրությունները, թե ստուգումների ժամանակ ինչ խնդիրներ են բացահայտվել։ Ղուկասյանը ևս մեկ անգամ պնդեց, որ իր նկատմամբ քաղաքական հետապնդում է իրականացվում։
«Երեսուն-քառասուն հոգի աշխատում են քաղաքապետարանում, որոնք մասնագետներ են և իրենք են այդ գործունեությունը ծավալում, իսկ քաղաքապետն այնտեղ ընդհանրապես անելու բան չունի. վերջում նրանց արածը հաստատում է, կարող է նաև չհաստատել»,– նշեց Վարդան Ղուկասյանը։
Ղուկասյանի գործով հաջորդ դատական նիստը կկայանա փետրվարի 10–ին` ժամը 16։00–ին։
Հիշեցնենք՝ հոկտեմբերի 20-ին ուժայինները ներխուժեցին Գյումրու քաղաքապետարան, որպեսզի բերման ենթարկեն համայնքապետ Վարդան Ղուկասյանին։ Հակակոռուպցիոն կոմիտեն հայտարարեց, որ 8 անձ է ձերբակալվել մի խումբ պաշտոնատար անձանց կողմից խոշոր չափերով կաշառք ստանալու, վերջիններիս կաշառք տալու մեղադրանքներով։ Հոկտեմբերի 21-ի առավոտյան Գյումրու համայնքապետ Վարդան Ղուկասյանը կալանավորվեց 2 ամսով։
Հոկտեմբերի 26-ին հայտնի դարձավ, որ Ղուկասյանին նոր մեղադրանք է առաջադրվել Հայաստանի` այլ երկրների հետ միություն կազմելու վերաբերյալ մտքերի համար։ ՔԿ–ն նոյեմբերի 21-ին հայտնեց, որ նրա նկատմամբ հանրային քրեական հետապնդում է հարուցվել նաև ՔՕ 297-րդ հոդվածի 2-րդ մասի 1-ին և 3-րդ կետերով (մի խումբ անձանց կողմից տեղեկատվական կամ հաղորդակցական տեխնոլոգիաներն օգտագործելով կատարված խուլիգանությունը։