ԵՐԵՎԱՆ, 24 դեկտեմբերի – Sputnik. ԱԺ նախկին պատգամավոր, հասարակական–քաղաքական գործիչ Ռուբեն Հակոբյանը մեղավոր է ճանաչվել, որպես պատիժ է սահմանվել 2 մլն 700 հազար դրամի չափով տուգանք։ Այդ մասին Sputnik Արմենիայի հետ զրույցում ասաց ԱԺ նախկին պատգամավոր, հասարակական–քաղաքական գործիչ Ռուբեն Հակոբյանի փաստաբան Գրիգոր Մղդեսյանը։
Ռուբեն Հակոբյանը 2025–ի հուլիսի 19–ին կալանավորվել էր «իշխանությունը զավթելու կոչի համար»։ Օգոստոսի 27–ին դատարանը վերացրել էր նրա խափանման միջոց կալանքը։
Նա նշեց, որ այսօր Երևան քաղաքի ընդհանուր իրավասության դատարանում տեղի է ունեցել նիստ, որի ժամանակ էլ որոշվել է Հակոբյանին մեղավոր ճանաչել, սակայն նա կմնա ազատության մեջ. Հակոբյանի նկատմամբ որպես պատիժ սահմանվել է տուգանքը:
«Դատավճիռը բողոքարկելու ենք։ Մենք ամբողջ դատավարության ընթացքում պնդում էինք և այժմ էլ պնդում ենք, որ մեղադրական վերդիկտով սահմանափակվել է քաղաքական, քննադատական խոսքը, ինչը տեղ չունի ժողովրդավարական հասարակության մեջ։ Այդ իսկ պատճառով, առավել ևս քաղաքական գործիչների դեպքում, պետությունը պետք է ավելի հանդուրժող լինի և թույլ տա նրանց իրենց ընդդիմախոսներին առավել սուր քննադատել, քանի որ ժողովրդավարության հիմունքները հենց դրա համար են»,– ընդգծեց նա։
Նշենք, որ Ռուբեն Հակոբյանին մեղադրանք է առաջադրվել այն բանի համար, որ նա, երկար տարիներ հանդիսանալով ՀՀ Ազգային ժողովի պատգամավոր, իրական ազդեցություն ունենալով անձանց լայն շրջանակի վրա, համաձայն չլինելով ներքաղաքական հարցերի վերաբերյալ ՀՀ կառավարության դիրքորոշումների հետ, 2025 թվականի հուլիսի 1-ին զանգվածային լրատվության միջոցով՝ Հ2 հեռուստատեսության յութուբյան ալիքի «Խոսքի իրավունք» հաղորդաշարին հարցազրույց տալու ընթացքում հնչեցրել է իշխանությունը զավթելուն ուղղված հրապարակային կոչ։
Հիշեցնենք` ԱԺ նախկին պատգամավորը հուլիսի 18–ին ձերբակալվեց 2025 թվականի հուլիսի 1-ին զանգվածային լրատվության միջոցով հարցազրույց տալու ընթացքում «իշխանությունը զավթելուն ուղղված հրապարակային կոչ հնչեցնելու համար»։
Ռուբեն Հակոբյանը 2 ամսով կալանավորվեց հուլիսի 19–ին։
Հուլիսի 22-ին նա կալանավայրից նամակ հղեց` հայտարարելով, որ չի զղջում հեռուստահաղորդման ընթացքում տված քաղաքական գնահատականների և հայտարարությունների համար, որոնց համար էլ նրան ազատությունից զրկել են։