Երևանում ձմռան համար առկա բոլոր ռեսուրսները բավարար չափով պատրաստ են, բաշխումն իրականացվել է։ Այս մասին Երևանի քաղաքապետարանի գործակարգավարական խորհրդակցության ժամանակ ասաց քաղաքապետի գլխավոր քարտուղար Կամո Արեյանը։
«Դեկտեմբերի-փետրվար ամիսների համար կազմվել է սանմաքրման և ձյան մաքրման համար գործողությունների պլանը։ Բոլոր պատասխանատու մարմինները տեղեկացված են, իսկ վարչական շրջանների ղեկավարների հետ խորհրդակցություն է կայացել, որտեղ մանրամասն քննարկվել է գործողությունների ժամանակացույցը։ Առկա ռեսուրսները բավարար չափով պատրաստ են, ռեսուրսների բաշխում է իրականացվել»,- նշեց Արեյանը։
Նրա խոսքով՝ ներգրավված է 241 միավոր տարբեր տեխնիկա՝ նախատեսված տարբեր գործողությունների համար, իսկմ մարդկային ռեսուրսներից` 614 բանվորական ուժ: Արեյանի պնդմամբ՝ բոլոր աշխատանքների վերահսկողությունը կատարելու է տվյալ վարչական շրջանի ղեկավարը։ Երթուղիների ցանցի և ժամանակացույցի պահպանման պատասխանատուն ԵԱՍՄ հիմնարկն է։
Երևանում հսկողությունն իրականացնելու է Կամո Արեյանը՝ կոմունալ տնտեսության վարչության պետ Արսեն Կարոյանի հետ միասին։
Ինչ վերաբերում է աղ ու ավազով աշխատանքներ իրականացնելուն, ապա քաղաքապետի գլխավոր խորհրդականը շեշտեց՝ բավարար չափով խառնուրդ կուտակված է Նոր Նորքում (2 կետ), Արաբկիրում (2 կետ) և Շենգավիթում (1 կետ)։ Սա առաջին խմբաքանակն է, բայց ԵԱՍՄ-ն լրացուցիչ նույնպես ներկրում է։
Արեյանը ներկայացրեց նաև ամեն տարի կրկնվող խնդիրներից մեկը՝ յուրաքանչյուր տնտեսվարող էլ իր կազմակերպության դիմաց պետք է մաքրեր, ինչի մասին վարչական շրջանների ղեկավարները պետք է ծանուցեին։ Վարչական շրջաններից ստացված տեղեկությունների համաձայն, նախնական Երևանի 9088 տնտեսվարողից ծանուցում ստացել է 4156-ը։ Այս պահին 100 տոկոսով ծանուցվել են Նուբարաշենի, Քանաքեռ-Զեյթունի տնտեսվարողները, իսկ Նորք-Մարաշի դեպքում 80-85 տոկոսն է ծանուցվել։ Մյուս վարչական շրջանների տնտեսվարողների նույնիսկ կեսը տեղյակ չեն։
Ըստ խորհրդականի՝ անհրաժեշտ է նաև խիստ հսկողություն սահմանել բոլոր ավտոլվացման կետերում, քանի որ նրանք ջրերը բաց են թողնում դեպի փողոց, իսկ գիշերերն արդեն ջերմաստիճանը ցածր է լինում ու ճանապարհները սառում են։