Չինաստանն ԱՄՆ-ին է ուղարկել Թայվանին զենքի մատակարարումների հետ կապված իր պատկերացումները

ԵՐԵՎԱՆ,19 դեկտեմբերի - Sputnik. Չինաստանն իր լուրջ պատկերացումներն է ներկայացրել ԱՄՆ-ին՝ կապված Թայվանին սպառազինությունների լայնածավալ մատակարարման ծրագրերի հետ: Այդ մասին հայտարարել է ՉԺՀ-ի պաշտպանության նախարարության պաշտոնական ներկայացուցիչ Ծյան Բինը: Նրա խոսքերը մեջբերում է ՌԻԱ Նովոստին։

Պենտագոնի պաշտպանական համագործակցության և անվտանգության գործակալությունն ավելի վաղ հայտնել էր, որ Թայվանին ԱՄՆ-ի կողմից հաստատված զենքի, տեխնիկայի և ռազմական ծառայությունների վաճառքի ընդհանուր արժեքը կազմում է ավելի քան 11 միլիարդ դոլար: Մասնավորապես, խոսքը «Javelin» համալիրների, «ALTIUS-700M» և «ALTIUS-600» անանձնակազմ համակարգերի, «AH-1W SuperCobra» ուղղաթիռների, «HIMARS» ՀԿՌՀ-ների, «M107A7» ինքնագնաց հրետանային կայանքների, «TOW» հակատանկային հրթիռային համալիրների մասին է։

Նա նշել է, որ ԱՄՆ-ն բազմիցս խախտել է իր պարտավորությունները, հրահրել և նպաստել Թայվանի անջատողականությունը, ինչն էլ անախորժություններ է կառաջացնի հենց Միացյալ Նահանգների համար:

«Չինաստանը կոչ է անում ԱՄՆ-ին անհապաղ դադարեցնել Թայվանին զենք վաճառելը։ Չինաստանի ժողովրդա-ազատագրական բանակը կշարունակի ռազմական պատրաստությունը և գործնական միջոցներ կձեռնարկի պետական ինքնիշխանությունն ու տարածքային ամբողջականությունը պաշտպանելու համար», - ավելացրել է Ծյան Բինը:

Չինաստանի կենտրոնական կառավարության և իր կղզային նահանգի միջև պաշտոնական հարաբերություններն ընդհատվել են 1949 թվականին, երբ Չինաստանի Կոմկուսի հետ քաղաքացիական պատերազմում պարտված Գոմինդանի ուժերը՝ Չան Կայշիի գլխավորությամբ, տեղափոխվել են Թայվան։ Կղզու և մայրցամաքային Չինաստանի միջև գործնական և ոչ պաշտոնական շփումները վերսկսվել են 1980-ականների վերջին: 1990-ականների սկզբից կողմերը սկսել են Թայվանի նեղուցով կապ հաստատել ոչ կառավարական կազմակերպությունների մակարդակով՝ Պեկինի Հարաբերությունների զարգացման ասոցիացիան և Թայբեյի Փոխանակումների հիմնադրամը։