ԵՐԵՎԱՆ, 10 դեկտեմբերի – Sputnik. ԱՄՆ նախագահ Դոնալդ Թրամփը դեռ չի շտապում չեղարկել պատժամիջոցները Ռուսաստանի դեմ, միայն ընդլայնում է դրանք։ Այս հայտարարությունն արել է ՌԴ արտգործնախարար Սերգեյ Լավրովը։
«Բոլորը լսել են, թե ինչպես է նախագահ Թրամփը մեղադրում նախորդ նախագահ Բայդենին, որ իր գործողություններով խաթարել է դոլարի նկատմամբ վստահությունը և, ինչպես ինքն է ասել, դրդել, որ ԲՐԻԿՍ երկրները այլընտրանքային վճարային հարթակներ փնտրեն։ Այս գործընթացը, որը դիպուկ նկատել է ԱՄՆ–ի գործող նախագահը, այժմ արագանում է ոչ միայն ԲՐԻԿՍ-ի շրջանակներում։ Եվ դրա մեղավորը միայն Բայդենը չէ, ոչ էլ պատժամիջոցները, որոնք, ի դեպ, ԱՄՆ գործող առաջնորդը ոչ միայն չի շտապում չեղարկել, այլև ընդլայնում է», – ասել է նա՝ ելույթ ունենալով Դաշնության խորհրդում։
Ավելի վաղ Թրամփը հայտարարել էր, որ Վաշինգտոնը շատ հզոր պատժամիջոցներ է սահմանում Ռուսաստանի դեմ և մտադիր չէ հրաժարվել դրանցից։
Հոկտեմբերի վերջին ԱՄՆ-ն պատժամիջոցներ կիրառեց Ռուսաստանի երկու խոշորագույն նավթային ընկերությունների՝ «Ռոսնեֆտի» և «Լուկոյլի» նկատմամբ՝ «խաղաղության գործընթացի նկատմամբ Ռուսաստանի կողմից լուրջ հետաքրքրության բացակայության» պատճառով։ Նրանց բոլոր ակտիվներն ու գույքային շահերը, որոնք գտնվում էին ԱՄՆ տարածքում կամ ԱՄՆ քաղաքացիների վերահսկողության տակ, սառեցվել են։
ՌԴ նախագահ Վլադիմիր Պուտինը նոր սահմանափակումները որակել է որպես Մոսկվայի վրա ճնշում գործադրելու փորձ։