ԵՐԵՎԱՆ, 10 դեկտեմբերի - Sputnik. Մայր աթոռի դիվանապետ Արշակ արքեպիսկոպոս Խաչատրյանի քեռու և քեռու դստեր բնակարաններում խուզարկություններ են իրականացվել։ Տեղեկությունը Sputnik Արմենիայի հետ զրույցում ասաց Արշակ սրբազանի փաստաբան Արսեն Բաբայանը։
«Ես նման տեղեկություն ունեմ։ Երկու բնակարանից էլ առգրավել են բոլոր հեռախոսներն ու համակարգիչները, ինչքան եղել է՝ տարել են։ Ընդ որում` երկու բնակարանում այդ խուզարկությունների արձանագրությունների պատճենները չեն տրվել, իսկ մեկում նույնիսկ խուզարկության որոշումը չի եղել»,- ասաց Բաբայանը։
Ըստ Բաբայանի՝ սրբազանի հարազատներին նույնիսկ թույլ չեն տվել կապ հաստատել իրենց փաստաբանի հետ։
Հիշեցնենք, եկեղեցու դեմ իշխանությունների արշավի ֆոնին
մայիսի 30-ին ՀՀ վարչապետ Նիկոլ Փաշինյանը «Ֆեյսբուքի» իր էջում գրառում կատարեց, որտեղ հիշատակել էր սրբազաններից մեկին ու վերջինի քեռակնոջը` օգտագործելով վիրավորական և կոպիտ բառապաշար։ Այդ արտահայտության համար նա հուլիսին պարզաբանում էր ներկայացրել կոռուպցիայի կանխարգելման հանձնաժողովին։
Հետո «Հայկական Վիկիլիկս» անվանումով նորաբաց տելեգրամյան ալիքը հոկտեմբերի 25-ին ինտիմ բնույթի տեսագրություն հրապարակեց` դրանք վերագրելով Արշակ արքեպիսկոպոս Խաչատրյանին։ Հոգևորականն արձագանքեց` նշելով, որ անգամ ուժերի գերլարումով չի կարող լծվել հորինվածքների ու զրպարտությունների հերքմանը, խելամիտ է համարում արհամարհել:
Արշակ արքեպիսկոպոս Խաչատրյանը դեկտեմբերի 1-ին ասուլիս հրավիրեց և հայտարարեց, որ իրեն վերագրվող տեսագրությունները կեղծիք են։ Դրանից հետո սրբազանին 7 տարվա վաղեմության դեպքի մեղադրանքով 2 ամսով կալանավորեցին։