ԵՐԵՎԱՆ, 8 դեկտեմբերի – Sputnik. Միքայել և Բագրատ սրբազաններն ու գործարար, բարերար Սամվել Կարապետյանը «Երևան–Կենտրոն» ՔԿՀ–ում պահվում են միջին պայմաններում` այնպիսի պայմաններում, ինչպիսին մյուս ազատազրկված անձիք են գտնվում։ Այդ մասին ԱԺ–ում ճեպազրույցի ժամանակ ասաց ՀՀ քրեակատարողական հիմնարկների ծառյության պետ Ծովինար Թադևոսյանը։
Նա չժխտեց, որ «Նուբարաշեն» ՔԿՀ–ի պայմանները համեմատության մեջ ամենավատն են (այնտեղ է պահվում Արագածոտնի թեմի առաջնորդ Մկրտիչ սրբազանը–խմբ.), դրա համար այս տարի որոշակի ուսումնասիրություններ են իրականացնում` այլընտրանք գտնելու համար։
«Տեղային լուծումներ տրվում են` խցեր, երկարատև տեսակցության սենյակներ են վերանորոգվում, սակայն շենքային պայմաններն այնպիսին չեն, որ կարողանանք համակարգային լուծումների գնալ»,– ընդգծեց Թադևոսյանը։
Ինչ վերաբերում է Միքայել սրբազանի առողջության հետ կապված խնդիրներին, ապա նա վստահեցրեց, թե տեղեկություններ չունի և իրավասություն էլ չունի խոսել այդ մասին, քանի որ դա նաև բժշկական գաղտնիք է պարունակում։
«Այս տիպի տեղեկությունները մեզ չի հասցեագրվում, ու բժիշկները պարտավոր էլ չեն մեզ որևէ տեղեկություն հաղորդել։ Ես` որպես անձ, չունենալով բժշկական կրթություն` հասկանում եմ, ենթադրում եմ, որ օրինակ` տվյալ անձը չի կարող իր պատիժը կրել ՔԿՀ–ում, այդ պատճառով այս հարցով կոմունիկացվում ենք առողջապահության նախարարության հետ ու պատժի կրման այլ տարբերակ գտնում»,– նշեց ՔԿՀԾ պետը։
Ինչ վերաբերում է ՔԿՀ–ների ծանրաբեռնվածությանը, ապա նա տեղեկացրեց, որ այս պահին ՀՀ բոլոր ՔԿՀ–ը միասին վերցված կա 2 845 դատապարտյալ ու դեռ հնարավորություն ունեն լրակազմով մինչև 4000 անձի պահելու։
Թադևոսյանն ասաց, որ դատապարտյալների թվում այս պահին կա ազատությունից զրկված 6 անչափահաս, որոնք ՔԿՀ–ներում հայտնվել են ամենածանր հանցանքների համար, քանի որ մնացած դեպքերում պատժի կրման այլ տարբերակներ են ընտրվում։