ԵՐԵՎԱՆ, 8 դեկտեմբերի - Sputnik. Աշխարհում լարվածության հետագա էսկալացիան, ուժային ճնշումն ու միջամտությունը ինքնիշխան երկրների ներքին գործերին կարող են գլոբալ մասշտաբի դիմակայություն հրահրել։ Այս մասին հայտարարել են ՀԱՊԿ Խորհրդարանական վեհաժողովում:
Ինչպես նշել են կառույցում, անբաժանելի եվրասիական անվտանգության ճարտարապետության կառուցումը հատուկ նշանակություն է ձեռք բերում բազմաբևեռ աշխարհի կայացման ու տարբեր սպառնալիքների սրման պայմաններում:
«Մեր անփոփոխ և հաստատուն հանձնառությունն ենք հայտնում բարիդրացիության և պետությունների խաղաղ գոյակցության քաղաքականության առաջմղմանը՝ միմյանց ազգային շահերը պատշաճ հաշվի առնելով, միջպետական հակամարտություններն ու վեճերը քաղաքական-դիվանագիտական միջոցներով հաղթահարելու համար համատեղ լուծումներ գտնելու հարցում», - ընդգծվում է հայտարարության մեջ:
ՀԱՊԿ ԽՎ խորհրդի համատեղ նիստը և 18-րդ լիագումար նստաշրջանն անցկացվում են ՌԴ Պետդումայի հարթակում՝ Պետդումայի խոսնակ Վյաչեսլավ Վոլոդինի նախագահությամբ:
Նիստին մասնակցում են խորհրդարանական պատվիրակություններ Բելառուսից, Ղազախստանից, Ղրղզստանից, Տաջիկստանից, ինչպես նաև Իրանից: Միջոցառմանը Հայաստանը ներկայացված չէ։