ԵՐԵՎԱՆ, 7 դեկտեմբերի – Sputnik․ ՀՀ իշխանության ներկայացուցիչները Սպիտակում հարգանքի տուրք են մատուցել 1988 թվականի ավերիչ երկրաշարժի զոհերի հիշատակին:
Տեսանյութը հրապարակվել է ՀՀ վարչապետ Նիկոլ Փաշինյանի տելեգրամյան պաշտոնական ալիքում։
Կադրերից երևում է, որ Փաշինյանի հետ միասին երկրաշարժի զոհերի հիշատակը հավերժացնող հուշակոթողի մոտ ծաղիկներ ու ծաղկեպսակներ են խոնարհել ՀՀ նախագահ Վահագն Խաչատուրյանը, ԱԺ նախագահ Ալեն Սիմոնյանը, ՏԿԵ նախարար Դավիթ Խուդաթյանը, Լոռու մարզպետ Արեն Մկրտչյանը։
Հիշեցնենք` 1988–ի դեկտեմբերի 7-ին` ժամը 11: 41-ին, Հայաստանում տեղի ունեցավ ամենասարսափելի աղետներից մեկը` ավելի քան 9 բալ ուժգնությամբ ավերիչ երկրաշարժը։ Րոպեների ընթացքում լրիվ կամ մասնակի ավերվեցին Լենինականը, Սպիտակը, Կիրովականը, Ստեփանավանը, ընդհանուր առմամբ` 21 քաղաք և 324 գյուղ։ Պաշտոնական տվյալներով` երկրաշարժի զոհ դարձավ ավելի քան 25 հազար մարդ, սակայն իրականում թիվն անցնում էր 35 հազարը։ Անօթևան դարձավ 530 հազար մարդ։