ԵՐԵՎԱՆ, 6 դեկտեմբերի – Sputnik. Երկրում չպետք է լինի մեկ պաշտոն, որը կենտրոնացնում է իր ձեռքում կառավարման գրեթե բոլոր լիազորությունները։ Այս մասին իր աջակիցների հետ հանդիպմանն ասել է ՀՀ 2–րդ նախագահ Ռոբերտ Քոչարյանը` պատասխանելով հանդիպման մասնակիցներից մեկի հարցին, թե արդյոք 2026 թ ընտրություններում հաղթանակի դեպքում պատրաստվում է վերադարձնել նախագահական կամ կիսանախագահական մոդելը։
«Ինձ համար գոնե պարզ է, որ չպետք է լինի մեկ պաշտոն, որը կենտրոնացնում է իր ձեռքում այսքան լիազորություններ, և նախագահի պաշտոնը պետք է հակակշիռ լինի նման դեպքերի համար»,– ընդգծեց Քոչարյանը։
Ըստ նրա` դատական իշխանությունը որևէ կապ չպետք է ունենա գործադիր իշխանության հետ, քանի որ այն, ինչ կատարվում է դատական համակարգում, խայտառակություն է։
«Այո՛, պետք է գնալ որոշակի փոփոխությունների, թեև երկիրը կարող է մնալ խորհրդարանական։ Ասում էին` սուպերվարչապետություն, տեսանք սուպերվարչապետության հետևանքները, սակայն փաստի հետ առնչվելով` մենք պետք է հասկանանք, որ ինչ–որ բաներ պետք է հետ պտտեցնենք»,– հայտարարեց ՀՀ 2–րդ նախագահը։
Նա տեղեկացրեց, որ ժամանակին Սահմանադրության այս կետին դեմ է արտահայտվել` տեսնելով բոլոր այս վտանգները։
Հիշեցնենք` գործող Սահմանադրությունը, որն ընդունվել է 2015 թվականին` հանրաքվեով, ներկայիս իշխանությունը նախկինում քննադատում էր` որակելով այն ՀՀ երրորդ նախագահ Սերժ Սարգսյանի իշխանության վերարտադրման համար գրված փաստաթուղթ, քանի որ այն վերջինիս թույլ էր տալիս մնալ իշխանության ղեկին` վարչապետի պաշտոնում։