ԵՐԵՎԱՆ, 6 դեկտեմբերի – Sputnik. Արագածոտնի թեմի Հովհաննավանքի հոգևոր հովիվ տեր Սարգիս քահանա Սարգսյանը մեկ ամիս է` չի գնում այնտեղ։ Այս մասին նա լրագրողներին ասաց «Զվարթնոց» օդանավակայանում, որտեղ մի խումբ քաղաքացիների հետ պատրաստվում է դիմավորել Ֆրանսիայից Հայաստան վերադարձող Ամենայն հայոց կաթողիկոս Գարեգին 2–րդին։
«Մայր աթոռը հայտարարություն արեց, որ եկեղեցին պետք է սրբագործվի, այդ պատճառով իմ կամ որևէ այլ օծյալ հոգևորականի ծես կատարելն այնտեղ այլևս իմաստ չունի, քանի որ այն մարդը, որը կարգալույծ է հռչակվել, օրենքով սահմանված կարգով պետք է լքի այդ տարածքը, որտեղ նա գտնվելու իրավունք չունի։ Այդ ժամանակ եկեղեցին կմաքրվի, կսրբագործվի»,– հայտարարեց նա։
Դիտարկմանը, որ կարգալույծ եղած Ստեփան Ասատրյանն անգամ եկեղեցու կողպեքն է փոխել, տեր Սարգիսը նշեց, որ դա էական նշանակություն չունի, քան այն, որ Մայր աթոռը խնդիր է դրել, որ Ստեփան Ասատրյանն ազատի տարածքը։
Նրա տեղեկություններով` Հովհաննավանքի տարածքում, թե գյուղի մեջ շարունակում են հսկողություն իրականացնել ոստիկանության աշխատակիցները։
«Մենք մեր միաբանությամբ ամեն ինչ անում ենք, որ թեմի հոգևոր ծառայությունը չտուժի»,– ընդգծեց տեր Սարգիսը։
Հիշեցնենք` Հովհաննավանքի կարգալույծ արված քահանան՝ Ստեփան Ասատրյանը, (նախկինում՝ տեր Արամ. խմբ․) հոկտեմբերի 26-ին «պատարագ» մատուցեց։ Թեպետ Մայր աթոռը բազմիցս հայտարարեց, որ եկեղեցական ծես անցկացնել կարող է միայն օծված հոգևորականը, սակայն ոչ միայն Ստեփան Ասատրյանը հետ չկանգնեց իր մտադրությունից, այլև ՀՀ վարչապետ Նիկոլ Փաշինյանը, նախարարներ, մարզպետներ և Ստեփան Ասատրյանի ու ՔՊ–ի հարյուրավոր համակիրներ մասնակցեցին հայտարարված «պատարագին»։ Ավելին` ազդարարվեց նաև, որ Ստեփան Ասատրյանը «պատարագ» է մատուցելու նաև նոյեմբերի 2-ին։