ԵՐԵՎԱՆ, 6 դեկտեմբերի – Sputnik. 72 տարեկան հասակում մահացել է անվանի բժիշկ, ԵՊԲՀ պատվավոր պրոֆեսոր, պլաստիկ վիրաբույժ Արտավազդ Սահակյանը։ Լուրը «Ֆեյսբուքի» իր էջում հայտնել է Երևանի պետական բժշկական համալսարանի ռեկտոր, 1–ին համալսարանական հիվանդանոցի տնօրեն Արմեն Մուրադյանը։
«Իր տեսակով անկրկնելի, մշտապես առույգ ու կենսախինդ կոչումով բժիշկ… Խորը ցավով տեղեկացա, որ կյանքից անժամանակ հեռացել է անվանի բժիշկ, ԵՊԲՀ պատվավոր պրոֆեսոր Արտավազդ Բագրատի Սահակյանը։ Կորուստը մեծ է համալսարանական ընտանիքի համար»,– գրել է նա։
Արտավազդ Սահակյանը «Հերացի» հիվանդանոցային համալիրի պլաստիկ վիրաբուժության և միկրովիրաբուժության կլինիկայի ղեկավարն էր, ԵՊԲՀ պլաստիկ վիրաբուժության ամբիոնի վարիչը։
Արմեն Մուրադյանը նշել է, որ Սահակյանի ղեկավարած թիմի շնորհիվ մի շարք բարդ ու առաջին հայացքից անհավանական թվացող վիրահատություններ են կատարվել։
1984 թվականից Արտավազդ Սահակյանի ղեկավարած թիմի աշխատանքները ներկայացվել են Ռուսաստանի, ԱՄՆ-ի, Գերմանիայի, Շվեյցարիայի, Կանադայի, մի շարք այլ երկրների մասնագիտական հավաքների ժամանակ:
Մուրադյանը նշել է, որ Արտավազդ Սահակյանի բուժառուները ոչ միայն Երևանից ու մարզերից էին, այլև տարբեր աշխարհամասերից:
«Խորապես ցավում եմ անդառնալի կորստի կապակցությամբ։ Հանգչիր խաղաղությամբ, կոչումով բժիշկ...»,– նշել է ԵՊԲՀ ռեկտորը։
Ի դեպ, պլաստիկ և միկրովիրաբուժության բնագավառում բացառիկ միջամտություններ կատարող վիրաբույժ Սահակյանը մասնագիտական երկարամյա աշխատանքի ընթացքում կատարել է շուրջ 50 հազար վիրահատություն: