ԱՊՀ-ում բարեկամական կապերի կառուցումը Ռուսաստանի կարևորագույն առաջնահերթությունն է. ՌԴ ԱԳՆ

ԵՐԵՎԱՆ, 4 դեկտեմբերի - Sputnik. ԱՊՀ շրջանակներում բարեկամական և փոխշահավետ կապերի կառուցումը Ռուսաստանի արտաքին քաղաքական կարևորագույն գերակայությունն է։ Այս մասին ՌԴ ԱԳՆ պաշտոնական ներկայացուցիչ Մարիա Զախարովան հայտարարել է դեկտեմբերի 8-ին Անկախ պետությունների համագործակցության ձևավորման մասին համաձայնագրի ստորագրման 34-ամյակին ընդառաջ կայացած ճեպազրույցի ժամանակ:

Նրա խոսքով՝ այդ փաստաթուղթն իսկապես պատմական դեր է խաղացել՝ թույլ տալով նախկին միութենական հանրապետությունների միջև պահպանել դարավոր կապերը, կանխել դրանց խզումը և հիմնել է նոր անկախ պետությունների փոխգործակցության կայուն սկզբունքներ:

Երկրները միջազգային օրակարգի առանցքային հարցերի շուրջ համակարգում են դիրքորոշումները, իսկ ԱՊՀ իրավապայմանագրային բազայում կա ավելի քան 650 միջազգային փաստաթուղթ, և այդ թիվը մշտապես աճում է:

Զախարովայի խոսքով՝ ամրապնդվում է ԱՊՀ համագործակցությունը արտաքին գործընկերների, առաջին հերթին ՄԱԿ-ի և եվրասիական առաջատար կառույցների՝ ԵԱՏՄ-ի, ՀԱՊԿ-ի և ՇՀԿ-ի հետ:

2025 թվականի հոկտեմբերի 10-ին ԱՊՀ-ին Դուշանբեում պաշտոնապես տրամադրվել է ՇՀԿ-ին կից դիտորդի կարգավիճակ, ինչը, ՌԴ ԱԳՆ գնահատմամբ, կարևոր քայլ էր միջազգային փոխգործակցության ընդլայնման գործում։

Համագործակցությունում ստեղծվել է միջազգային անվտանգության ամրապնդմանն ուղղված բազմակողմանի մեխանիզմների արդյունավետ համակարգ։ ԱՊՀ ձևաչափով համատեղ աշխատանքը և այլ կազմակերպությունների հետ ջանքերի համակարգումը նպաստում են ահաբեկչության, ծայրահեղականության, նարկոթրաֆիկի, կազմակերպված հանցավորության դեմ պայքարի արդյունավետության բարձրացմանը, ինչպես նաև արտաքին սահմանների պահպանության ապահովմանը:

Զախարովան հատուկ նշանակություն է տվել միասնական մշակութային-հումանիտար տարածքի պահպանմանը։ ԱՊՀ ժողովուրդներին միավորում են ընդհանուր հոգևոր և բարոյական արժեքները, հարգանքը ավանդույթների, պատմական հիշողության և համատեղ անցյալի նկատմամբ: Նա նաև կարևորել է Հայրենական մեծ պատերազմում ընդհանուր հաղթանակի դերը: