ԵՐԵՎԱՆ, 28 նոյեմբերի – Sputnik. ՀՀ Ազգային ժողովը շուտով օրենսդրական նախաձեռնություններով հանդես կգա` լուծելու հանրապետությունում օդի աղտոտվածության խնդիրը։ Այս մասին այսօր խորհրդարանի ամբիոնից հայտարարեց ԱԺ նախագահ Ալեն Սիմոնյանը։
«Մենք լուրջ խնդիր ունենք, ու խոսքը վերաբերում է օդի աղտոտվածությանն ամբողջ հանրապետությունում և հատկապես Երևանում, որն իր դիրքի պատճառով կարծես կուտակային լինի, և այստեղ օդի աղտոտվածությունը 3-4 անգամ ավելի բարձր է»,– հայտարարեց նա։
Ըստ նրա` այս հարցին մինչ օրս շատ անլուրջ ենք վերաբերվել, ու բոլորիս մեղքն այս հարցում կա։
«Զարմանալ, դժգոհել չլինի. մենք այս հարցը օրենսդրական կարգով պետք է լուծենք։ Զգուշացնում եմ` օրենսդրական նախաձեռնություններ են լինելու։ Պետք է որոշենք` մենք կա՛մ թույն ենք շնչում ու տարբեր քաղցկեղածին հիվանդություններից մեր հարազատներին կորցնում ենք, կա՛մ մենք որոշումներ ենք կայացնում»,– ընդգծեց ԱԺ նախագահը։
Սիմոնյանը հայտարարեց` այն մեքենաները, որոնք հին են ու աղտոտում են շրջակա միջավայրը, այն կազմակերպությունները, որոնք շինարարություն են անում ու նորմերը չեն պահպանում, ինչպես նաև ավազի հանքերը խիստ կարգավորումների տակ են ընկնելու։
«Կատալիզատորները որ մեքենաների միջից հանում ենք, ծխախոտի բիչոկները մեքենաների պատուհաններից կտտցնում ենք դուրս, բոլոր այս դեպքերում խիստ կարգավորումներ են լինելու»,– եզրափակեց նա։
Հիշեցնենք, որ ՀՀ կառավարության` նոյեմբերի 27–ի նիստի ժամանակ ՀՀ վարչապետ Նիկոլ Փաշինյանը հայտարարեց, որ օդի աղտոտվածությամբ և Երևանում երթևեկության խցանումներով զբաղվող երկու խումբ կստեղծվի։
Մինչ այդ արդեն հայտնի էր դարձել, որ նոյեմբերի 18–ի որոշմամբ Երևանի ավագանին որոշել էր ստեղծել «Երևանի երթևեկության կառավարման կենտրոն» համայնքային հիմնարկ՝ երթևեկության ոլորտում ավելի ճկուն քաղաքականություն վարելու համար։Մինչ այդ Երևանի քաղաքապետ Տիգրան Ավինյանը շահագրգիռ կառույցների ներկայացուցիչների հետ ճգնաժամային խմբի քննարկման ժամանակ հայտարարել էր, որ մայրաքաղաքում ավելացող խցանումների լուծումը տեսնում է մասնավոր մեքենաների օգտագործումը սահմանափակելու մեջ: