ԵՐԵՎԱՆ, 27 նոյեմբերի – Sputnik. Օդի աղտոտվածությամբ և Երևանում երթևեկության խցանումներով զբաղվող երկու խումբ կստեղծվի։ Այս մասին այսօր ՀՀ կառավարության նիստի ժամանակ հայտարարեց ՀՀ վարչապետ Նիկոլ Փաշինյանը։
«Դիտարկելով համացանցում և մամուլում, հանրային քննարկումներում առկա իրողությունները, ինչպես նաև անձամբ արձանագրելով` ես հանգել եմ այն եզրակացության, որ անհրաժեշտ է վարչապետի որոշմամբ երկու աշխատանքային խումբ ստեղծել։ Խմբերից մեկը պետք է զբաղվի օդի աղտոտվածության խնդիրներով` հասկանալով խնդիրն ու կոնկրետ լուծումներ տալով։ Երկրորդ խումբը երթևեկության կարգավորման հետ կապված խցանումների հաղթահարման աշխատանքային խումբ կլինի»,– տեղեկացրեց նա։
Վարչապետը նաև նշեց, որայս խմբերում ներառված կլինեն նաև քաղաքացիական հասարակության և փորձագիտական հանրության անդամներ։
Հիշեցնենք, որ Երևանի ավագանու` նոյեմբերի 18–ի որոշմամբ` Երևանում կստեղծվի «Երևանի երթևեկության կառավարման կենտրոն» համայնքային հիմնարկ՝ երթևեկության ոլորտում ավելի ճկուն քաղաքականություն վարելու համար։
Ավելի վաղ Երևանի քաղաքապետ Տիգրան Ավինյանը շահագրգիռ կառույցների ներկայացուցիչների հետ ճգնաժամային խմբի քննարկման ժամանակ հայտարարել էր, որ մայրաքաղաքում ավելացող խցանումների լուծումը տեսնում է մասնավոր մեքենաների օգտագործումը սահմանափակելու մեջ: