ԵՐԵՎԱՆ, 26 նոյեմբերի - Sputnik. Մոսկվայից Իրանի Բենդեր Աբբաս նավահանգիստ «Հյուսիս-հարավ» միջազգային տրանսպորտային միջանցքով (ՄՏՄ) բեռնափոխադրումների միջին ժամանակը վերջին երկու տարիների ընթացքում 27 օրից կրճատվել է մինչև 16 օր։ Այս մասին այսօր հայտարարել է «Ռուսական երկաթուղիներ»-ի գլխավոր տնօրեն Օլեգ Բելոզյորովը Բաքվում կայացած ԱՊՀ մասնակից պետությունների երկաթուղային տրանսպորտի խորհրդի նիստում։
«Ռուսաստանի, Ադրբեջանի, Ղազախստանի, Թուրքմենստանի և Իրանի երկաթուղայինների լարված աշխատանքի շնորհիվ վերջին երկու տարվա ընթացքում Մոսկվայից Իրանի Բենդեր Աբբաս նավահանգիստ բեռնափոխադրման միջին ժամկետը 27 օրից կրճատվել է մինչև 16 օր», – նշել է նա։
Բելոզյորովը նաև նշել է Ադրբեջանի որոշումը Հայաստան բեռնափոխադրումների տարանցման համար սահմանափակումները վերացնելու մասին ։ 30 տարվա ընթացքում առաջին անգամ Ռուսաստանից և Ղազախստանից այդ երթուղավ բեռնափոխադրումներ են իրականացվել։
«Շնորհակալություն եմ հայտնում այս բեռնափոխադրմանը մասնակցած բոլոր երկաթուղիներին, և հույս ունեմ, որ այս երթուղին ակտիվ կզարգանա»,– հայտարարել է Բելոզյորովը։
«Հյուսիս-հարավ» ՄՏՄ-ն 7,2 հազար կիլոմետր երկարությամբ մուլտիմոդալ երթուղի է Սանկտ Պետերբուրգից մինչև Մումբայ նավահանգիստ (Հնդկաստան): ՄՏՄ-ի երեք երթուղի գոյություն ունի` տրանսկասպյան (երկաթուղիների և նավահանգիստների օգտագործմամբ), արևմտյան և արևելյան (ցամաքային)։ 2023 թվականի մայիսին Ռուսաստանն ու Իրանը փաստաթղթեր են ստորագրել «Հյուսիս-հարավ»-ի արևմտյան երթուղու Իրանում Ռաշտ-Աստարա երկաթուղու վերջին անհրաժեշտ հատվածի կառուցման վերաբերյալ։
Ընդհանուր արժեքը 1.6 մլրդ եվրո է, որից 1.3 մլրդ–ը Ռուսաստանի վարկն է, իսկ մնացածը` իրանական կողմի միջոցները։