Բաքվի Նարիմանովսկի շրջանում գտնվող AFEN Plaza բիզնես կենտրոնի շենքում պայթյուն է տեղի ունեցել, որի հետևանքով ավերածություններ են եղել վեց հարկերից հինգում։ Այս մասին հայտնում է Ադրբեջանի ՆԳՆ մամուլի ծառայությունը։
Հանրապետական շտապ և անհետաձգելի բուժօգնության կենտրոնի տվյալներով՝ 7 մարդ տուժել է, բազմաթիվ վնասվածքներով նրանց տեղափոխել են կլինիկական բուժկենտրոն։ Տուժածների վիճակը միջին ծանրության է։
Ոստիկանությունը հետաքննություն է սկսել։
AFEN Plaza-ի սեփականատեր Աբուլֆատ Ալիևը ներկայացրել է իր վարկածը։
«Նշում են, որ միջադեպը տեղի է ունեցել գազի արտահոսքի պատճառով։ Սակայն այս շենքում գազ չկա։ Շենքի առջև կառուցվող ճանապարհին գազի խողովակ էր վնասվել։ Արդյունքում շենքի տակ գազի արտահոսք է տեղի ունեցել»,–ասել է նա։
Պայթյունի պատճառների մասին պաշտոնական վարկած դեռ չկա։