ԵՐԵՎԱՆ, 22 նոյեմբերի – Sputnik. Սահմանադրական հանրաքվեն պետք է տեղի ունենա 2026թ–ի խորհրդարանական ընտրություններից հետո։ Ինչպես հայտնում է ՀՀ վարչապետի մամուլի ծառայությունը, Երևանի Կարեն Դեմիրճյանի անվան մարզահամերգային համալիրում ՀՀ պետական մարմինների ներկայացուցիչների առաջին համաժողովի ժամանակ այս մասին հայտարարել է ՀՀ վարչապետ Նիկոլ Փաշինյանը։
«Դա կարևոր է, որպեսզի քաղաքական ուժերը հասարակությանը ներկայացնեն տվյալ հարցի վերաբերյալ իրենց տեսակետները, իսկ արդեն ձայների մեծամասնությունը ստացած ուժի դիրքորոշումը վճռորոշ նշանակություն կունենա նոր Սահմանադրության նախագծի ձևավորման գործում»,–ասել է նա։
Նա նշել է, որ Սահմանադրությունը պետք է ապահովի պետության երկարաժամկետ ընթացքի համար անհրաժեշտ աերոդինամիկա, և այդ աերոդինամիկան կարող է տուժել, եթե պատկերացումը հստակ և միասնական չլինի, թե ինչ ենք մենք ուզում ունենալ՝ ավտոմեքենա՞, ինքնաթի՞ռ, թե՞ տիեզերանավ։
Փաշինյանը կրկին շեշտել է, որ Հայաստանին պետք է ոչ թե սահմանադրական փոփոխություն, այլ նոր Սահմանադրություն։
«Ինչու նոր Սահմանադրություն և ոչ թե սահմանադրական փոփոխություններ։ Որովհետև սա Հայաստանի համար նոր քաղաքական բովանդակություն է, նոր գիտակցություն, նոր քաղաքական և պետական վարդապետություն, և ինչպես Նոր կտակարանում է ասվում՝ նոր գինին նոր տիկերի մեջ»,–հայտարարել է ՀՀ վարչապետը։
Հիշեցնենք` Ադրբեջանի իշխանությունները բազմիցս հայտարարել են, որ Հայաստանի հետ խաղաղության պայմանագիր կկնքեն միայն ՀՀ Սահմանադրության փոփոխությունից հետո, քանի որ Սահմանադրության նախաբանում հիշատակվում է նաև Արցախի հարցը։
Թեև ՀՀ իշխանությունը չի ժխտում, որ Բաքուն նախապայման է դնում, սակայն նշում է, որ Սահմանադրություն փոխելը կապ չունի այդ պահանջի հետ և պետք է հենց Հայաստանին։