ԵՐԵՎԱՆ, 18 նոյեմբերի - Sputnik. «Միր» վճարային համակարգը քննարկում է կենսաչափական վճարումների ներդրման հեռանկարները։ Այս մասին լրագրողներին հայտնել է Ազգային վճարային քարտերի համակարգի (ռուսական «Միր» վճարային քարտերի համակարգի օպերատոր) գործադիր տնօրեն Դմիտրի Դուբինինը նոյեմբերի 11-12-ը Երևանում կայացած ՊԼԱՍ միջազգային ֆինանսական ֆորումի արդյունքներով։
Հարցին, թե հետաքրքիր է արդյոք կենսաչափական վճարումների հնարավորությունը (լինի դա մատնահետքերի կամ այլ եզակի կենսաչափական տվյալների միջոցով-խմբ.) ռուսական բիզնեսին (բանկերին, մարկետփլեյսներին և այլ շահագրգիռ կողմերին), Դուբինինը դրական պատասխան է տվել՝ հավելելով, որ ընկերությունը քննարկում է տարբերակները և միջնաժամկետ հեռանկարում աշխատում է դրանց համար լուծումների վրա:
Հարցն այն է, որ կենսաչափության հարցում հասարակության մեջ շատ է անվստահությունն ու կասկածը. որքան ուժեղ են դրանք, այդքան շատ է տեղեկատվական վակուումը, հավելել է նա։
«Այդ պատճառով մենք պայմանավորվել ենք, որ դրանով կզբաղվենք շուկայի մասնակիցների հետ, կպատմենք ինչպես կենսաչափության, այնպես էլ ցանկացած այլ տեխնոլոգիաների, դրանց դրական և բացասական կողմերի, դրանց կիրառման ժամանակ ճշտության պահպանման մասին», - հավելել է Դուբինինը:
Երկարաժամկետ հեռանկարում ընկերությունը նաև ուսումնասիրում է հետքվանտային գաղտնագրության տեխնոլոգիաները, այսինքն՝ անձնական և ֆինանսական տվյալների պաշտպանության այնպիսի մակարդակ, որը հաշվի կառնի քվանտային համակարգիչների և դրանց հաշվողական հզորությունների առաջացումը, որոնք կարող են օգտագործել ոչ միայն շուկայի բարեխիղճ մասնակիցները, այլև խաբեբաները:
«Շատ կարևոր է սկսել արդեն հիմա մշակել այդ բոլոր լուծումները, որպեսզի այն պահին, երբ այդ տեխնոլոգիաները հասանելի դառնան նրանց, մենք կարողանանք դիմակայել։ Ըստ մեր զգացողությունների, այդ բոլոր գործընթացները կարող են տեղի ունենալ 2030-ից հետո, բայց մենք ունենք ճանապարհային քարտեզ, որով մենք անցնելու ենք նոր, ավելի բարդ գաղտնագրության», - ասել է Դուբինինը:
Նա հավելել է, որ ընկերությունն արդեն հավաքագրել է տեխնոլոգիական մասնագետների թիմ և աշխատանքային խմբեր է ձևավորել ռուսաստանյան շուկայի մասնակիցների հետ։ Այնուամենայնիվ, ընկերությունը պատրաստ է նաև կիսվել իր փորձով հայ գործընկերների հետ։
Ավելացնենք՝ ըստ տվյալների, որը ներկայացրել է Ռուսաստանի բանկի Ազգային վճարային համակարգերի վարչության տնօրեն Ալլա Բակինան, նոր վճարային տեխնոլոգիաների (կամ վճարումների ընդունման) պահանջարկը ռուսական շուկայում կայուն աճում է։ 2024 թվականին պայմանականորեն ասած ՝ ոչ հիմնական վճարային մեթոդները (այսինքն՝ վճարումները QR կոդերի, Bluetooth-ի և այլ տեխնոլոգիաների միջոցով, որոնք դեռևս չեն համարվում ֆինանսական շուկայում հիմնական) կազմել են գործարքների 6%-ը, իսկ 2025 թվականի սկզբին այս ցուցանիշը հասել է 14%-ի: