ԵՐԵՎԱՆ, 17 նոյեմբերի – Sputnik. Սաուդյան Արաբիան հետաքրքրված է ռուսական փոքր հեռահարության ՀՕՊ համակարգերով, ցամաքային զորքերի տեխնիկայով և իր տարածքում արտադրության տեղայնացմամբ։ Այս մասին Դուբայում ավիատիեզերական ցուցադրությունից առաջ ՌԻԱ Նովոստիին ասել է Ռազմատեխնիկական համագործակցության գծով դաշնային ծառայության տնօրեն Դմիտրի Շուգաևը։
«Սաուդյան Արաբիան հատկապես հետաքրքրված է ժամանակակից փոքր հեռահարության ՀՕՊ համակարգերի, ցամաքային զորքերի տեխնիկայի մատակարարմամբ, ինչպես նաև թագավորության տարածքում սպառազինության առանձին նմուշների արտադրության տեղայնացմամբ», - ասել է Շուգաևը։
Նա ընդգծել է, որ Սաուդյան Արաբիայի հետ ռազմատեխնիկական համագործակցությունը կայուն զարգանում է, պարբերաբար անցկացվում են խորհրդակցություններ և գործնական հանդիպումներ երկու երկրների համապատասխան գերատեսչությունների և պաշտպանական արդյունաբերության ձեռնարկությունների միջև, արդյունավետ գործում է ռազմատեխնիկական համագործակցության ռուս-սաուդյան համատեղ հանձնաժողովը։