ԵՐԵՎԱՆ, 16 նոյեմբերի - Sputnik. Նոյեմբերի 15-ին Ամենայն հայոց կաթողիկոս Գարեգին Երկրորդը Մայր Աթոռ Սուրբ Էջմիածնում ընդունել է «Աղոթքի նախաճաշ» նախաձեռնության առիթով Հայաստան ժամանած օտարերկրյա մի խումբ հյուրերի, հայտնում են Մայր աթոռի տեղեկատվական համակարգից։
Վեհափառ Հայրապետն անդրադարձել է Հայոց եկեղեցու՝ հայ ժողովրդի կյանքում կարևոր դերակատարությանը՝ նշելով, որ Սուրբ Էջմիածինը նվիրական սրբավայր է համայն հայության համար և պատմության ամենադժվար պահերին օգնել է ազգին հավատով և հույսով դիմագրավելու բոլոր մարտահրավերներին:
Ամենայն հայոց կաթողիկոսը պատասխանել է նաև հյուրերի հարցերին, որոնք առնչվում էին Եկեղեցու և իշխանության միջև ստեղծված լարվածությանը և հակաեկեղեցական գործողություններին, մասնավորապես ապօրինաբար ազատազրկված հոգևորականներին ու հայորդիներին առաջադրված անհիմն մեղադրանքներին։
Ամենայն հայոց կաթողիկոսն ընդունել է «Աղոթքի նախաճաշ» նախաձեռնության մասնակիցներին
Հանդիպմանը անդրադարձ է կատարվել արցախահայերի ծանր կացությանը և նրանց կարիքներին ուղղված Եկեղեցու կողմից իրականացվող սոցիալական ծրագրերին, ինչպես նաև Բաքվում պահվող ռազմագերիների ու պատանդառված քաղաքացիական անձանց, արցախահայերի իրավունքների պաշտպանության և Արցախի հոգևոր-մշակութային ժառանգության պահպանության խնդիրներին։
Հիշեցնենք, որ ավելի վաղ «Աղոթքի նախաճաշի» մի քանի մասնակիցներ կոչ էին արել Հայաստանի իշխանություններին ազատ արձակել կալանավորված հոգևորականներին: