ԵՐԵՎԱՆ, 21 հոկտեմբերի – Sputnik. Ժողովրդի միասնության օրվան ընդառաջ Մոսկվայում առաջին անգամ կմեկնարկի «Ռուսաստանի և ԱՊՀ–ի ժողովուրդներ» միջազգային փառատոնը, որն անցկացվում է ՌԴ անվտանգության խորհրդի հովանու ներքո: Այս մասին տեղեկացնում է ՌԴ ԱԽ աշխատակազմի մամուլի ծառայությունը։ Միջոցառումը կանցկացվի 2025 թվականի հոկտեմբերի 31-ից նոյեմբերի 5-ը Ռուսաստանի մայրաքաղաքի երեք վայրերում:
Փառատոնի նախաձեռնողը Ազգությունների հարցերով դաշնային գործակալությունն է՝ ՌԴ նախագահի և ՌԴ անվտանգության խորհրդի աշխատակազմերի, ինչպես նաև ՌԴ ԱԳՆ աջակցությամբ: Կազմակերպական աշխատանքներին մասնակցում են նաև Ռուսաստանի մշակույթի նախարարությունը, Ռոսսոտրուդնիչեստվոն, Մոսկվայի կառավարությունը, ռուսական «Գիտելիք» ընկերությունը, Ռուսական աշխարհագրական ընկերությունը և այլ գործընկերներ:
Փառատոնը կմիավորի գործարար, կրթական և մշակութային ծրագրերը: Հյուրերը հնարավորություն կունենան այցելելու Ռուսաստանի պատմական, մշակութային և բնական հարստությունը ներկայացնող ցուցահանդեսներ, կմասնակցեն վարպետության դասերի: Բացումը տեղի կունենա հոկտեմբերի 31-ին ՌԴ անվտանգության խորհրդի քարտուղար Սերգեյ Շոյգուի գլխավորությամբ անցկացվող լիագումար նիստով: Այնուհետև կմեկնարկի «Ռուսաստանի ժողովուրդներ» VI համառուսաստանյան համաժողովը, որը կներառի նստաշրջաններ` նվիրված հոգևոր և բարոյական արժեքներին, ապակառուցողական գաղափարների դեմ տեղեկատվական պայքարին, օտարերկրացիների հարմարեցման հարցում օգնությանը և Ռուսաստանի ու ԱՊՀ ժողովուրդների պատմական հիշողության պաշտպանությանը։
Բացի այդ, համաժողովի շրջանակում նախատեսվում է Համառուսաստանյան սեմինար-հանդիպում և Ռուսաստանի Դաշնության սուբյեկտների ղեկավարների հետ պետական ազգային քաղաքականության իրականացման ռազմավարական նստաշրջան: Փառատոնի մասնակիցները հնարավորություն կունենան մասնակցելու «Մեծ ազգագրական թելադրություն» հոբելյանական 10-րդ համառուսաստանյան կրթական ակցիային։
Գործարար ծրագիրը կշարունակվի «Մոսկինո» կինոպարկի հարթակում՝ «Կինոյի դերը Ռուսաստանի և ԱՊՀ ժողովուրդների ընդհանուր մշակութային տարածքի ձևավորման գործում» լիագումար նստաշրջանով: Ակնկալվում է ԱՊՀ 6 երկրներից և Ռուսաստանի ավելի քան 15 տարածաշրջաններից կինեմատոգրաֆիայի առաջատար գործիչների ներկայություն: Մասնակիցները կքննարկեն կինոարտադրության զարգացումը, համատեղ կինոնախագծերը և հայրենասիրական դաստիարակությունը: Տեղի կունենան նաև Ռուսաստանի ազգային խորհրդանիշների վերաբերյալ նստաշրջաններ, որոնց կմասնակցեն դասախոսներ, հայտնի ստեղծագործողներ և հանրահայտ բլոգերներ: