ԵՐԵՎԱՆ, 20 հոկտեմբերի - Sputnik. ԱՄՆ նախագահ Դոնալդ Թրամփը հայտարարել է, որ չի հավատում Ռուսաստանի հետ հակամարտությունում Ուկրաինայի հաղթելու հնարավորությանը, թեև լիովին չի բացառում նման սցենարը: Այս մասին նա ասել է Սպիտակ տանը լրագրողների հետ զրույցում։
«Նրանք դեռ կարող են հաղթել։ Ես չեմ կարծում, թե դա տեղի կունենա, բայց նրանք կարող են», - ասել է Թրամփը։
Նա նաև հայտարարել է, որ Ուկրաինայի հակամարտության կարգավորման շուրջ բանակցությունների ձախողման դեպքում շատերը ստիպված կլինեն «մեծ գին վճարել»:
«Մենք փորձում ենք համաձայնության հասնել։ Եթե այն ձեռք բերվի, հիանալի է։ Եթե ոչ, շատերը մեծ գին կվճարեն», - ասել է Թրամփը։
ԱՄՆ նախագահը չի հստակեցրել, թե այդ դեպքում հատկապես ում կանդրադառնան իր նշած հետևանքները:
Հիշեցնենք` Ալյասկայում օգոստոսի 15-ին կայացել են Ռուսաստանի և ԱՄՆ–ի նախագահներ Վլադիմիր Պուտինի և Դոնալդ Թրամփի բանակցությունները: Առաջնորդների հանդիպումը տեղի է ունեցել Անքորիջի Էլմենդորֆ-Ռիչարդսոն ռազմաբազայում։ Նախագահները քննարկել են ուկրաինական հակամարտության կարգավորման ուղիները։ Երկու առաջնորդներն էլ հանդիպումը դրական են որակել։ Ռուսաստանի նախագահը գագաթնաժողովի արդյունքներով հայտարարել է Ուկրաինայում հակամարտության ավարտին հասնելու հնարավորության մասին և ընդգծել, որ Ռուսաստանը շահագրգռված է, որպեսզի կարգավորումը երկարաժամկետ բնույթ կրի: