Հոկտեմբերի 16–ին պայթեցվել է իր հետաքննչական գործունեությամբ հայտնի իտալացի հեռուստալրագրող Սիգֆրիդո Ռանուչիի մեքենան։ Այս մասին ասվում է «Rai 3» հեռուստաալիքով հեռարձակվող նրա «Report» հաղորդման շրջանակում։
«Report»-ի լրագրող և հաղորդավար Սիգֆրիդո Ռանուչիի մեքենայի տակ ռումբ է տեղադրվել։ Մեքենան պայթել է՝ վնասելով նաև ընտանիքին պատկանող մյուս մեքենան և հարևան տունը», – ասվում է X սոցցանցում հրապարակված հաղորդագրության մեջ։
Դեպքը տեղի է ունեցել հոկտեմբերի 16–ի երեկոյան Հռոմի հարավային արվարձաններից մեկում։ Պայթյունի հետևանքով վնասվել է նաև Ռանուչիի դստեր մեքենան։
Լրագրողը «Rainews24» հեռուստաալիքին տված մեկնաբանության մեջ հայտարարել է, որ մասնագետները տեղադրված պայթուցիկի քաշը մեկ կիլոգրամ են գնահատում։
«Մեքենաները գրեթե ոչնչացվել են։ Պայթյունից 20 րոպե առաջ ես արդեն տանն եմ եղել։ Այն շատ ուժեղ էր, բայց վախից բացի, ամեն ինչ կարգին է», – հայտարարել է Սիգֆրիդոն։
«Rai» պետական հեռուստաընկերությունում աշխատող լրագրողի խոսքով՝ նախկինում ինքը բազմիցս սպառնալիքներ է ստացել։