ԵՐԵՎԱՆ, 15 հոկտեմբերի – Sputnik. Հայաստանի հավաքականի ավագ Տիգրան Բարսեղյանի հեռացումը առանցքային դարձավ Իռլանդիայի ընտրանու հետ խաղում կրած պարտությունում։ Հայաստանի հավաքականի գլխավոր մարզիչ Եղիշե Մելիքյանն այսպես է մեկնաբանել 2026 թվականի աշխարհի առաջնության ընտրական փուլի չորրորդ տուրում Իռլանդիայի հետ խաղում թիմի կրած պարտությունը։
«Այո, կարմիր քարտը կոտրեց խաղը, բայց դա իմ խաղացողի սխալն էր, ուստի նաև իմը։ Այն ամենը, ինչ տեղի է ունենում իմ խաղացողների հետ, իմ պատասխանատվությունն է։ Ներողություն եմ խնդրում երկրպագուներից. նրանք գոլերի էին սպասում, բայց վերջին երկու խաղերում մենք չկարողացանք գոլ խփել` տարբեր պատճառներով։ Այնուամենայնիվ, ես հպարտանում եմ իմ թիմով», – հայտարարել է Մելիքյանը։
Մարզիչը նշել է, որ խաղից հետո անձամբ չի խոսել Բարսեղյանի հետ, սակայն դիմել է ամբողջ թիմին։ Նա շնորհակալություն է հայտնել խաղացողներին նվիրվածության, պայքարի և միասնության համար։
«Բացասական պահերը կվերլուծենք ավելի ուշ, հիմա կարևորը միասնական մնալն է, պարտությունը տղամարդավարի ընդունելն ու մեր մրցակիցներին շնորհավորելն է», – հավելել է հավաքականի մարզիչը։
Հիշեցնենք` երեկ Հայաստանի հավաքականը 2026 թվականի աշխարհի առաջնության ընտրական փուլում 0-1 հաշվով պարտվեց Իռլանդիային։ Երկրորդ խաղակեսում մեր թիմը մեկ խաղացողով պակաս էր, քանի որ Տիգրան Բարսեղյանը հեռացվեց խաղադաշտից ոչ սպորտային պահվածքի համար. նա գլխով հարվածել էր մրցակցին։