Բաքվի դատարանում անդրադարձել են «Գոյամարտ» հաղորդաշարին և «Կռունկ» կոմիտեին

ԵՐԵՎԱՆ, 13 հոկտեմբերի – Sputnik․ Բաքվի դատարանում անկախ լրատվամիջոցների, փաստաբանների և միջազգային կառույցների բացակայությամբ այսօր շարունակվել է Արցախի նախկին ռազմաքաղաքական ղեկավարների և մյուս գերիների գործով կեղծ դատավարությունը։

Ադրբեջանի պետական լրատվամիջոցները հայտնում են, որ այսօր «դատական նիստին» հրապարակվել են մի շարք փաստաթղթեր: Մասնավորապես քննարկվել է Արցախի Հանրապետության պաշտպանության բանակի «Գոյամարտ» հաղորդաշարը։

Փաստաթղթերից մեկն էլ վերաբերում էր «Կռունկ» կոմիտե, հասարակական–քաղաքական կազմակերպության ստեղծմանն ու գործունեությանը։

«Դատավարության» ընթացքում քննարկվել են նաև ՀՀ պաշտպանության նախարարության ստեղծման, կազմավորման վերաբերյալ մի շարք տեղեկություններ: Նաև հրապարակվել են ՀՀ զինված ուժերին պատկանող մի շարք փաստաթղթեր:

Հաջորդ «դատական նիստը» հոկտեմբերի 16–ին է:

Հիշեցնենք` հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:

Նախկին պետնախարար և բարերար Ռուբեն Վարդանյանի գործը քննվում է առանձին վարույթով: