ԵՐԵՎԱՆ, 10 հոկտեմբերի – Sputnik. Եվրասիական տնտեսական միության (ԵԱՏՄ) դռները միշտ բաց են նոր մասնակիցների համար, միությանն անդամակցելը օգտակար է։ Այս մասին հայտարարել է Ռուսաստանի նախագահ Վլադիմիր Պուտինը:
«Մենք բոլորս լավ գիտենք, թե ինչպես են դասավորվել մեր հարաբերություններն այստեղ այս 30 տարիների ընթացքում։ Եվ ԵԱՏՄ-ի ստեղծումը պատահական չէր, քանի որ ԱՊՀ–ի շրջանակում չէր հաջողվում գտնել այնպիսի մեխանիզմներ, որոնք ընդունելի կլինեին այդ գործընթացի բոլոր մասնակիցների համար։ Ուստի մի խումբ երկրներ առանձնանալով՝ խորացրին առևտրատնտեսական կապերը, ինչի արդյունքում առաջացավ ԵԱՏՄ-ն։ ԵԱՏՄ դռները միշտ բաց են, մենք գործընկերների հետ այսպես թե այնպես խոսում ենք դրա շուրջ», - ասել է Պուտինը ԱՊՀ պետությունների ղեկավարների խորհրդի նեղ կազմով նիստի ժամանակ։
Նա նշել է, որ դա տնտեսական օգուտներ է տալիս, ավելի շատ շուկաներ է բացում, ավելի շատ պայմաններ է ստեղծում կոոպերացիայի համար։
Ռուսաստանի նախագահը նաև հստակեցրել է, որ ԱՊՀ երկրների միջև գրեթե բոլոր հաշվարկներն ընթանում են ազգային արժույթներով. դրանց մասնաբաժինը 2025 թվականի առաջին կիսամյակում կազմել է 96%։
Հիշեցնենք` Տաջիկստանի մայրաքաղաք Դուշանբեում մեկնարկել է ԱՊՀ պետությունների ղեկավարների նեղ կազմով հանդիպումը։
Նիստին մասնակցում են Ադրբեջանի, Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի, Թուրքմենստանի և Ուզբեկստանի ղեկավարները: ԱՊՀ պետությունների ղեկավարների խորհրդի նիստում կքննարկվեն գործնական փոխգործակցությանն առնչվող հարցեր և կորոշվեն կազմակերպության առաջնահերթ ուղղությունները առաջիկա տարիների համար: Բացի այդ, երկրների ղեկավարները կքննարկեն միջազգային և տարածաշրջանային արդիական թեմաներ: Գագաթնաժողովի արդյունքում նախատեսվում է ընդունել մի շարք առանցքային փաստաթղթեր, այդ թվում` 2026-2030թթ. ԱՊՀ արտաքին սահմանների անվտանգության ամրապնդման, ահաբեկչությանն ու ծայրահեղականությանը հակազդելու ծրագրերը, ինչպես նաև մինչև 2030թ. ռազմական համագործակցության հայեցակարգը:
Գագաթնաժողովի ընթացքում նախատեսվում է հաստատել «ԱՊՀ+» ձևաչափի հիմնումը և Շանհայի համագործակցության կազմակերպությանը ԱՊՀ–ին առընթեր դիտորդի կարգավիճակ տալը: