ԵՐԵՎԱՆ, 7 հոկտեմբերի – Sputnik. 2018 թվականից հետո ՄԻԵԴ-ում Մարտի 1-ի հետ կապված բոլոր գործերով Հայաստանը պարտվելու է։ Այսօր լրագրողների հետ հանդիպմանն այս մասին հայտարարեց ՀՀ 2-րդ նախագահ Ռոբերտ Քոչարյանը՝ անդրադառնալով ՄԻԵԴ-ի՝ Մարտի մեկի հետ կապված վճռին։
Ավելի վաղ հայտնել էինք, որ 14 տարի անց Մարդու իրավունքների եվրոպական դատարանը հրապարակել է Մարտի 1-ի գործով վճիռը՝ արձանագրելով, որ 2008 թվականին ՀՀ իշխանությունները խախտել են զոհված քաղաքացիների կյանքի իրավունքը։
«Ավելին՝ ՄԻԵԴ-ի բոլոր որոշումները՝ կապված Մարտի 1-ի հետ, ինձ համար առոչինչ են, որովհետև 2018 թվականից հետո պետությունն այդ գործերի քննման ժամանակ չի պաշտպանվել։ ՄԻԵԴ-ը մոտ 6-7 անգամ կրկնում է, որ չեն տրամադրվել այս փաստաթղթերը, այն փաստաթղթերը»,- ասաց նա։
Քոչարյանի կարծիքով՝ ՄԻԵԴ-ի վճիռն իր հետ կապ չունի, քանի որ Մարտի 1–ից հետո ինքը մեկ ամսից մի քիչ ավելի է պաշտոնավարել։ Ավելին՝ շեշտեց, որ ՄԻԵԴ-ի վճռում՝ 110 էջանոց փաստաթղթում, մի բառ չկա սպանության մասին, այլ կա մահվան դեպքերի մասին։
«Եվրոպական դատարանի որոշումը նրա մասին է, որ պետությունը բավարար ջանքեր չի գործադրել մահվան դեպքերը բացահայտելու համար։ Այդ հայցը եղել է 2011 թվականին, իսկ այդ ժամանակ ես 3 տարի էր՝ նախագահ չէի»,- շարունակեց Քոչարյանը։
Ռոբերտ Քոչարյանը հիշեցրեց, որ 7 տարի է՝ քննչական մարմինները վարչապետի ենթակայության տակ են, հորդորեց բացահայտել։
«Չեն բացահայտում, որովհետև եթե բացահայտեն՝ իրենց վրա են գալու»,- ընդգծեց Ռոբերտ Քոչարյանը։
Հիշեցնենք՝ 2008 թվականի փետրվարի 20-ից Երևանի կենտրոնում Հայաստանի ընդդիմությունը, Հայաստանի առաջին նախագահ Լևոն Տեր-Պետրոսյանի ղեկավարությամբ, ցույցեր էր կազմակերպում նախագահական ընտրությունների արդյունքների դեմ: 2008 թվականի մարտի 1-ին դրանք վերածվեցին զանգվածային անկարգությունների։ Արդյունքում 10 մարդ զոհվեց, ավելի քան 200-ը՝ վիրավորվեց։