ԵՐԵՎԱՆ, 18 սեպտեմբերի – Sputnik. ԱՊՀ մաքսային մարմինները կունենան փորձաքննությունների և հետազոտությունների միասնական կենտրոն։ «ԱՊՀ մասնակից պետությունների մաքսային մարմինների մաքսային նպատակներով փորձաքննությունների և հետազոտությունների կենտրոնի մասին» համաձայնագրի կնքումն այսօր հավանության արժանացավ ՀՀ կառավարության նիստում։
Ըստ համաձայնագրի` կենտրոնը մաքսային նպատակներով կիրականացնի տեղեկատվական–վերլուծական և գիտամեթոդական փոխգործակցություն, կանցկացնի փորձաքննություններ ու հետազոտություններ։
«Համաձայնագրի հիմնական նպատակն է մշակել միատեսակ մոտեցումներ ԱՊՀ մասնակից պետությունների մաքսային մարմինների աշխատանքի կազմակերպման հարցում փորձաքննություններ և ուսումնասիրություններ նշանակելիս և իրականացնելիս»,– ասված է որոշման հիմնավորման մեջ:
Համաձայնագիրը կօգնի բարելավել ԱՊՀ մասնակից պետությունների մաքսային մարմինների արդյունավետությունը տնտեսական պաշտպանության, անվտանգության ամրապնդման և մաքսային ոլորտում իրավախախտումների դեմ պայքարի, ինչպես նաև փորձագետների ներուժի և մասնագիտական կարողությունների զարգացման գործում:
Կենտրոնի կարգավիճակում փորձագիտական հիմնարկի լիազորությունները կիրականացվեն 5 տարվա ընթացքում։